創造論

創造論（creationism）指主張宇宙係由上帝創造嘅理論。最廣義上嘅創造論，可以係指任何主張宇宙或者宇宙某啲部份係由上帝創造嘅諗法，可以同進化論等廿一世紀科學相容，例如有啲神學觀點就認為上帝創造大爆炸（The Big Bang），而且佢喺嗰陣時經已係預咗進化會產生出人類嘅。

狹義嘅創造論嘅基礎係相信創世記係無誤嘅歷史，所以宇宙只可能存在咗六千年左右；喺呢個前提下，｢點解宇宙淨係得幾千年歷史，但係睇落好似有成百億年歷史｣ 就變成一個科學研究議題。狹義嘅創造論否定宇宙無中心嘅假定（Copernican principle），認為宇宙係一個有限大嘅三維空間而唔係四維空間嘅表面；喺呢個假設下，宇宙會有中心同有邊緣，按照愛因斯坦嘅廣義相對論，萬有引力會令宇宙中心同宇宙邊緣所經歷嘅時間相差好遠。 狹義嘅創造論亦都否定宏進化，指出資訊理論下資訊量唔可能增長，同埋現實觀察嘅突變大多數都係變壞；狹義嘅創造論主張物種係由少量嘅被造物種（baramin），透過唔同嘅退化，演變成為多樣嘅特定物種。