粟米

How to read a taxobox

粟米

街市成日賣嘅粟米

物種分類

界	植物界
門(Divisio):	被子植物門
綱	單子葉植物綱
目	禾本目
科	禾本科
屬	包粟屬
種	粟米

二元學名

Zea mays
L.

粟米（粵拼：suk1 mai5；學名：Zea mays）；客家地區同埋廣州嘅粵語區亦做包粟（baau1 suk1），欽州、北海喊做粟包（suk1 baau1）；中國古代嗰時嗌御麥（jyu6 mak6）；佢係禾本科包粟屬嘅一年生草本植物，原產地喺南美洲嘅秘魯，而家喺全球各地都可以搵到。佢係當今世界主要食糧嘅一種。

發現史

1492年，嗰時嘅哥倫布發現咗美洲嘅新大陸之後，西班牙人就將粟米帶咗返嚟。重嗌佢做「印第安籽」，後嚟好快傳到全球各地。由於粟米嘅果穗有好多鬚，好似土耳其男人嘅鬍鬚噉，後嚟歐洲佬嗌佢做「土耳其麥」。而呢種植物直到16世紀初先至傳入中國。

樣

呢種植物多數都高1~4米幾，尤其係根系比較發達，有抗風支柱根。而莖係粗而有節，每節有髓兼多汁嚟儲存養分。而葉比較大，好似條線嘅披針噉，葉面比較嚡，有好多條平行嘅中脈，差唔多去到葉頂嗰度係向咗下沊。花係單性兼公乸同樹，其中花公生喺樹頂，一般係圓錐花序；而花乸係肉穗花序，一般着生喺樹杈度，受到花粉傳播之後結果。佢嘅果係穎果，有幾條葉包住一條帶有好多籽嘅粗稈。而籽一粒粒噉生喺果嘅出面，有黃、白、紅、紫同花斑等色。

適應能力

呢種植物嘅成熟期比較早，而且產量比較多，亦幾噤凍下。

用途

粟米最常見用途係做嘢食。除咗可以直接煮嚟食之外，重有好多種整法，譬如爆穀、墨西哥薄餅、墨西哥脆片，亦可以提煉成粟米油同埋磨成粟粉煮食用，更可以整粟米糖漿用喺食品加工。

農業方面，有時候粟米會當飼料用，而剩低嘅粟米莖同粟米葉就可以做燃料。

工業方面，粟米可以整工業用澱粉，之後加工成塑膠、布料同埋膠水，亦可以做生物燃料嘅原料，發酵成乙醇。

藥用價值

粟米嘅根、葉、花柱同柱頭、穗軸、籽，甚至花公嘅穗同榨出嘅油都可以做藥。有以下呢啲功效：

部位	功效
籽榨出嘅油	降壓，降血脂。
籽	調中開胃，利尿消腫。
花公穗	疏肝利膽
穗軸	健脾利濕
花柱／柱頭	利尿消腫，清肝利膽。
葉	利尿通淋
根	利尿通淋，祛瘀止血。