南園
想搵深圳政區嘅話，請睇南園街道。
南園，係元、明、清代廣州一個出名嘅園林。係喺廣東廣州越秀區文德路以東、文德東路同聚仁坊以北、聚賢北街以西一帶，因喺廣州城南厢，故名「南園」。
元至正十八年（1358年），孫蕢、黃哲、王佐、李德同趙介等五位詩人（史稱南園五子）喺度創辦咗南園詩社。明朝初年，改咗做總鎮花園，嘉靖年間起多咗祭祀文天祥、張世傑、陸秀夫嘅三大忠祠。後尾歐大任、梁有譽、黎民表、吳旦同李時行5位詩人，又喺度重結南園詩社（史稱南園後五子）。詩社嘅建立，對推動嶺南詩風以至詩人結社嘅風尚，都有唔細嘅影響作用[1]。
明崇禎十一年（1638年），陳子壯復修南園舊社，詩盟有弟子升，門人黎遂球，友人歐主遇，歐必元，區懷瑞，區懷年，黎邦瑊，黃聖年，黃季恆，徐棻及僧通岸等十二人，世號｢南園十二子｣[2]。
清代仲有好幾次修葺過，園入邊累積有正氣堂、臣範堂、遠風堂、南園前、後五先生祠等建築。
1893年孫中山、陸皓東、鄭士民同尢列等人，試過喺園內抗風軒商議建立革命團體。清朝末年逐漸荒廢，到宜家變咗做居民區。