叉燒煎蛋飯

叉燒煎蛋飯

叉燒煎蛋飯係香港常見嘅碟頭飯，將一碟叉燒飯加一隻煎太陽蛋，好多香港茶餐廳、燒臘檔同酒樓都有得賣。呢隻飯因為香港電影《食神》，所以又叫做「黯然銷魂飯」。

流行文化

「黯然銷魂飯」係香港電影《食神》入便嘅菜式名，係主角周星馳喺食神最終大賽做嘅後備出賽菜式。

「黯然銷魂」呢個詞出自南北朝人江淹嘅《別賦》：「黯然銷魂者，唯別而已矣！」金庸《神鵰俠侶》楊過所創嘅「黯然銷魂掌」，就係借用其意。楊過當年同小龍女喺絕情谷斷崖失散之後，一個人去到東海苦練武功，排解喪妻之痛。同周星馳喺《食神》喺少林寺山腳痛失女主角莫文蔚嘅情境有異曲同工之妙。

黯然銷魂飯其實係叉燒飯，加埋煎雞蛋、洋蔥同埋青菜。

「黯然銷魂飯」原本只係周星馳喺電影入便嘅戲稱，由於《食神》大收，香港一啲茶餐廳開始用「黯然銷魂飯」呢個名嚟稱呼叉燒煎蛋飯。呢個名後來傳到中國大陸同臺灣，演變到甚至有中學飯堂推出呢個飯嚟做招徠。