反問

反問（粵拼：faan2 man6）係種修辭手法，即係指將已經知道咗答案嘅問題反轉問返人。

反問可以加強語氣，突出問題嘅答案。

例子

例句

• 「佢都請咗病假啦，唔通你唔知佢病咗咩？」

  → 意思就係你應該知道佢病咗。

• 《論語》入邊有講到：「學而時習之，不亦悅乎？」（文言）

  → 粵譯：「學咗嘢之後時不時反覆溫書，唔係一件好愉快嘅事咩？」

  → 呢度孔子根本認定咗，學咗嘢之後時不時反覆溫書，係一件好愉快嘅事，但照樣用問句表達。

• 《愚公移山》入邊河曲智者講嘅呢句：「甚矣，汝之不惠。以殘年餘力，曾不能毀山之一毛，其如土石何？」（文言）

  → 粵譯：「你未免太蠢喇。你都咁大年紀啦，靠你淨低嘅時日同力氣，連山上嘅小草都整唔爛，仲想點樣掘走成座山啊？」

  → 呢度河曲智者根本認定咗愚公做嘅嘢係愚蠢嘅，但照樣用問句表達。

睇埋

• 設問