呈分試
呈分試係香港教育局根據校內考試嘅成績去編排全香港小學生嘅排名，呈分試唔係全港嘅統一考試，每間小學需要將每位學生五年級下學期同六年級頭兩次考試嘅成績呈交畀教育局，教育局會因應每位同學喺呢三次考試嘅成績來決定嗰位同學升中嘅派位組別，組別越高，可以派到Band 1中學、英文中學或最想入嘅中學嘅機會就越高[1]。
教育局會根據每間學校各方面嘅表現，例如TSA，教學評估，升中分班成績等因數去調整所屬校網所有學校同學生嘅成績排名，然後分為三個派位組別。所以學校同學生嘅排名都好重要。如果考試成績唔係太好，會直接影響同學升中嘅派位結果，未必能夠升讀想入嘅中學。
每科成績喺呈分試所佔嘅比重都唔同，根據教育局嘅建議，中文，英文同數學各佔24%，即係共72%，而剩低嘅28%會分畀常識，視覺藝術同音樂等科目。因為中英數呢三科已經佔咗大約四分三嘅比重，所以呢三科非常重要，但係並唔代表可以睇低其他科，因為有啲小學，呢啲所謂次要科目對佢哋都好重要，因為有啲學校嘅校內成績排名，兩位學生嘅平均分只差一分，排名都有機會相差十名以上。
2020年呈分試
2020年由於受到武漢肺炎影響，教育局宣布全香港學校停課延長，唔早過2020年3月16號復課，小六第三次呈分試會取消。呢一個學年嘅小六學生嘅中一派位將會根據小五第一次同小六第二次呈分試成績安排[2]。