周倉

周倉：幫關羽攞刀嗰個（左邊），以及關羽（右邊）

周倉（粵拼：zau1 cong1）係羅貫中小說《三國演義》入面嘅虛構人物。喺啲大戲劇目度，比如《走麥城》、《收周倉》、《收關平》入面，佢重有個字叫元福jyun4 fuk1。佢嘅形象係個關西大漢（關西即涼州），隻手有千斤怪力，個胸好似鐵板咁厚，身材高大，個面黑麻麻（maa4 maa1）而又多攣鬚（lyun1 sou1），所謂「鐵鬚銀齒、黑面朱脣」，係個武藝高強又大隻嘅鬍鬚佬。

周倉本來係黃巾軍首領之一張寶麾下將領，喺佢重喺黃巾軍度時就已經聽過關羽嘅大名。喺黃巾軍攻滅咗之後，佢同裴元紹以及啲殘軍落草爲寇，匿喺臥牛山度做山賊去劫貨爲生，呢時佢亦都諗起關羽，閉翳（bai3 ai3）自己跟唔到佢。不過喺關羽千里走單騎、過五關斬六將之後，遇得裴元紹同周倉，周倉即刻話要跟關羽。不過關羽當時護送住嘅劉備兩位夫人唔準關羽帶埋周倉班人馬走，浄可以帶走周倉一個人，於是周倉離開咗班黃巾殘軍跟咗關羽，而元紹同班手下繼續喺埋一齊。

喺《三國演義》度，周倉係個好有個性嘅人物，佢有樣叻係熟水性。喺樊城之戰時水攻魏軍，周倉喺水度同龐德對打，最後因龐德唔熟水性而輸咗。周倉亦係個忠肝之人，當關羽父子敗走麥城，畀東吳生擒、最後畀孫權斬首，佢聽到後自刎，同麥城守將王甫一齊殉主。

喺民間，周倉同關羽、關羽嘅仔關平一齊封聖，畀民間當神噉拜，喺神譜度，周倉嗌周大將軍，係關帝嘅貼身侍衞。