唐英傑案
 | 呢篇文記述緊一項香港嘅時人時事。 內容會隨住事件嘅進展而變動或者更新。 |
唐英傑案係第一單被控告違反香港國家安全法嘅案。被告唐英傑曾經參與反逃犯條例修訂運動。2020年7月1號，港區國安法實施當日，香港示威者喺香港島舉行七一遊行。下晝大約一點半，銅鑼灣百德新街一帶有人羣集結。廿三歲嘅唐英傑喺灣仔揸著部插有「光復香港 時代革命」旗幟嘅電單車，衝埋去由防暴警察組成嘅防線，喺穿越防線期間有最少三個警員係受咗傷[1]。警方喺7月1號以《港區國安法》拘捕咗10個人，只有唐英傑被落案起訴。[2]
當事人背景
[編輯]- 唐英傑，1996年9月7號出世，案發時候23歲，中五畢業，自細老豆阿媽就離婚，目前同老豆、細妹住公屋。佢曾經響和大勝丼餐廳做侍應，老豆為國際跆拳道聯盟黑帶七段唐國雄[3]。
事發經過
[編輯]喺遊行示威嘅當日下晝3點左近，綜合返傳媒同在場人士提供嘅目擊片段，係有一部車尾插咗「光復香港，時代革命」旗幟嘅橙紅色電單車，駛經灣仔謝斐道近柯布連道，跟住懷疑衝咗向防暴警察嘅防線方向。電單車喺轉右進入謝斐道之後喺柯布連道俾多名防暴警員包圍同嘗試截停：目擊片段顯示，多名防暴警員喺事發現場一度嘗試阻截電單車，而電單車未俾人截停期間有警員掂倒部車然後笪咗落地下，電單車就噉樣失去平衡令司機跟住碌埋落地，最尾就俾圍上去嘅警員一齊制伏咗[4][5]。
定罪嘅過程
[編輯]拘捕
[編輯]
警方最初嘅講法話，下晝三點半左近，喺灣仔柯布連道近謝斐道度係有一男子揸著電單車，撞去喺處執勤緊嘅警員，電單車跟著係被截停，嗰陣時見到車度插著寫有「光復香港 時代革命」嘅旗幟，警方隨即拘捕司機，理由係涉嫌瘋狂駕駛及違反《港區國安法》[6]。
控罪
[編輯]7月3號，警方正式落案控告唐英傑觸犯《港區國安法》下嘅「煽動他人分裂國家罪」（第20及21條）同「恐怖活動罪」（第24條）兩條罪名，並喺7月6號喺西九龍裁判法院提堂。呢個係香港法院首次開庭審訊有關《港區國安法》嘅案件，亦都令到唐英傑成為首個被控違反國安法嘅被告。[7]唐英傑喺庭上被國安法指定法官蘇惠德拒絕保釋，還押到10月6號再審。[8]佢喺8月向高等法院申請人身保護令同保釋，被法官周家明同李運騰駁回。[9]10月6號，律政司對兩項控罪作出修訂，案件喺11月16號轉介高等法院審理。[10]唐喺庭上否認控罪，繼續還押。[11]
審判程序
[編輯]2021年2月9號，律政司司長鄭若驊引用國安法第46條，決定唐英傑案冇陪審團，改由三個指定國安法法官共同審理。[12]唐英傑就「冇陪審團」嘅決定喺4月7號入稟高等法院提請司法覆核[13]，喺5月20號被李運騰裁定敗訴。[14]
開審
[編輯]唐英傑案喺2021年6月23號開審，審期預計係十五日，由三個法官共同審理。控方獲准加控唐英傑「危險駕駛引致他人身體受嚴重傷害」，作為「恐怖活動罪」嘅交替控罪[15]。 負責落案嘅律政司署理助理刑事檢控專員張卓勤試過呈交埋中國大陸刑法叢書俾法庭，話希望法庭量刑嘅時候會以呢啲資料做參考[16]。
判罪
[編輯]7月29號，3名國安法指定法官喺聽取咗求情後，喺30號下晝係宣判唐英傑獲刑9年，另加埋停牌10年[17]。喺判刑嘅時候法官杜麗冰解話，「煽動他人分裂國家罪」嘅量刑起點係六年半，「恐怖活動」量刑起點係八年，當中嘅兩年六個月分期執行，所以就合共判咗呢個結果[16]。
上訴
[編輯]唐英傑初頭對定罪同刑期提出上訴，本嚟已經排期2022年3月開審，但到2022年1月13號，唐英傑用「唔信任法援處委派嘅代表律師」做理由放棄上訴。
評論
[編輯]
- 香港保安局局長鄧炳強回應判刑結果時話：「我們對佢嘅定罪表示歡迎；至於佢嘅判刑，我們要回去詳細研究判詞，才去想下一步行動。」
- 國際特赦組織（Amnesty International）：亞太區主管亞米妮（Yamini Mishra）喺判決出咗之後話，呢個結果係證實咗啲人嘅恐懼，話國安法唔單止向香港嘅政府批評者灌輸咗恐怖意識，仲係一個愛來囚禁佢哋嘅武器[16]。
- 臺灣陸委會喺面書發表聲明譴責呢次判案，認為係曝露咗中共當局假借國安嘅名堂，藉法律訴訟變相咁政治鎮壓香港，屬於係殘害民主人權嘅作法[18]。
- 全國港澳研究會副會長劉兆佳話，呢次判決「為特區政府日後嘅執法行動打下強固嘅基礎，對反中亂港分子形成震攝，亦反映出香港嘅司法機關能夠負起維護國家安全嘅重責」。
- 中學時政發言人Michael話，一句「光時」口號都可以違反國安法，批評呢單案立咗一個先例，估計之後會有更多類似嘅案件，仲可能會發生以言入罪嘅情況[19]。
- 建制派政治人陳克勤、容海恩認為呢次判得太輕，相比起七二一白衣人畀人判三到七年不等，覺得咁樣係反映七二一判得太重，又表示唐英傑並冇悔意，應該要判重啲；而葛珮帆就話外界啲乜鬼「鎮壓異己」完全係顛倒黑白，認為唐英傑係罪有應得。[20]
爭議
[編輯]判刑結果重過部分嘅維權人士
[編輯]對比返大陸其他個案，譬如係批評中共政府民族政策嘅藏人蔡貢加，俾控「煽動分裂國家罪」而喺2018年獲刑3年；倡導藏語教育嘅藏人扎西文色，亦俾控「涉煽動分裂國家罪」，收尾係獲刑5年[21]。
而去到2021年9月20號，美國媒體 VICE World News亦報道，香港一名法官接受匿名專訪嘅時候提到，唐英傑案係一場唔公平嘅審訊，又認為唐英傑本質上只係違反交通條例，判刑太嚴重[22]。
睇埋
[編輯]參考
[編輯]- ↑ 〈國安法首案 電單車男涉撞警今午出院 「指定法官」蘇惠德拒絕被告保釋〉。《明報》 (香港中文)。2020-07-06。原先內容歸檔喺2020-07-08。喺2020-07-07搵到。
- ↑ 〈七一遊行・持續更新｜警：已拘捕逾370人 10人涉違《國安法》〉。《香港01》 (香港中文)。2020-07-01。原先內容歸檔喺2020-07-01。喺2020-07-01搵到。
- ↑ 〈【唐英傑案】控方引內地刑法書作判刑參考 案件周五判刑〉。Radio Free Asia (英文)。喺2021-07-30搵到。
{{cite web}}: Unknown parameter|archive-=ignored (help)CS1 maint: url-status (link) - ↑ 涉駕駛電單車插「光復」旗帜 男子被控違國安法 互聯網檔案館嘅歸檔，歸檔日期2020年7月4號，. 2020-07-03 香港商報網
- ↑ 被控恐怖活動 煽動他人分裂國家2罪 港版國安法首案23歲男駕光復旗電單車撞警 互聯網檔案館嘅歸檔，歸檔日期2021年8月2號，. 2020-07-04 成報
- ↑ 電單車司機展「光時」旗與警相撞 被控煽動分裂國家、恐怖活動兩罪 首宗國安案今審理 互聯網檔案館嘅歸檔，歸檔日期2021年8月2號，. 立場新聞2020-07-03
- ↑ 〈首位被控違反港版國安法的港人被延後到本月20日再開庭〉。美國之音。原先內容歸檔喺2020-08-17。喺2020-08-25搵到。
- ↑ 〈官引第42條拒保釋還押至10月再訊 23歲電單車男坐輪椅上庭：身心安好，繼續努力〉。《眾新聞》 (香港中文)。2020-07-06。原先內容歸檔喺2021-06-24。喺2021-06-09搵到。
- ↑ 〈被告唐英傑保釋申請被拒 官指潛逃重犯風險高〉。《眾新聞》 (香港中文)。2020-08-26。原先內容歸檔喺2021-06-24。喺2021-06-09搵到。
- ↑ 〈首宗國安法案件將轉介高院審理 未知會否設陪審團 七一插「光時旗」電單車手續還柙〉。《眾新聞》 (香港中文)。2020-10-06。原先內容歸檔喺2020-11-28。喺2021-06-09搵到。
- ↑ 〈首名被控國安法被告否認控罪 案件轉交高等法院〉。《NOW新聞》 (香港中文)。2020-11-16。原先內容歸檔喺2021-01-17。喺2021-06-09搵到。
- ↑ 〈律政司引用國安法第46條 首宗國安法案件不設陪審團〉。《頭條日報》 (香港中文)。2021-02-09。原先內容歸檔喺2021-06-24。喺2021-06-09搵到。
- ↑ 〈唐英傑司法覆核鄭若驊 指拒設陪審團不合法〉。《眾新聞》 (香港中文)。2021-04-08。原先內容歸檔喺2021-06-07。喺2021-06-09搵到。
- ↑ 〈唐英傑就不設陪審團提覆核 高院裁定敗訴 6.23 維持三法官審理〉。《立場新聞》 (香港中文)。2021-05-20。原先內容歸檔喺2021-05-22。喺2021-06-09搵到。
- ↑ 〈高院准控方加控危險駕駛作交替控罪 兩周後開審 控辯各傳專家證人闡釋口號〉。《眾新聞》 (香港中文)。2021-06-07。原先內容歸檔喺2021-06-24。喺2021-06-09搵到。
- ↑ 16.0 16.1 16.2 香港国安法首案：唐英杰因煽动分裂及恐怖活动罪被判九年监禁 互聯網檔案館嘅歸檔，歸檔日期2021年7月30號，. BBC中文 2021-07-30
- ↑ 唐英傑案｜《港區國安法》首案唐英傑判囚9年 律師：將上訴【附判辭連結】 互聯網檔案館嘅歸檔，歸檔日期2021年12月29號，. 明報
- ↑ 港首名國安法被告遭重判 陸委會：擴散寒蟬效應 互聯網檔案館嘅歸檔，歸檔日期2021年8月2號，. 2021-07-30 中央社
- ↑ 〈香港首宗国安法案被告煽动分裂及恐怖活动罪成 最高可判囚终身〉。《美國之音》 (中文)。原先內容歸檔喺2021-07-30。喺2021-07-30搵到。
- ↑ 〈政界批唐英傑案判刑太輕〉。hk.news.yahoo.com (中文)。原先內容歸檔喺2021-08-01。喺2021-08-01搵到。
- ↑ 【唐英傑案】判刑比部分內地維權人士更重 律師指成案例具指標作用 互聯網檔案館嘅歸檔，歸檔日期2021年8月2號，. RFA粵語 2021-07-30
- ↑ 〈美媒 VICE World News 訪問匿名香港法官 批唐英傑案判刑「太重」 | 立場報道 | 立場新聞〉。《立場新聞 Stand News》。原先內容歸檔喺2021-09-21。喺2021-09-21搵到。