啦更成本

啦更成本（粵拼：laa1 gaang1 sing4 bun2；英文：relevant cost），或者叫可避成本（avoidable cost），係成本一種，指自己而家呢刻嘅決策可以影響得到嘅成本。

旁置成本一定唔係啦更成本。

基本概念

内文：成本同決策

睇埋：旁置成本

想像以下噉嘅情況。

學費決策

有行為經濟學研究者喺 2010 年發表咗一篇文章，講佢哋做嘅一場經濟學實驗。場實驗嘅內容如下：研究者搵咗 400 幾位讀緊本科嘅學生做受試者，要求佢哋喺虛擬嘅環境下做決策；場決策係噉嘅—受試者得到一次工作機會，個工作機會要求佢哋上一個短短哋嘅課程，個課程（A）要交 100 文美金學費，而且無得退錢，合格率就係 75% 咁高；而研究者暗中將受試者分咗做三組，當中

• 第一組受試者可以用 50 文美金嘅價去上；
• 第二組受試者可以用 100 文美金嘅價去上；
• 第三組受試者就要用 150 文美金嘅價去上；

而受試者完全被蒙在鼓裡，唔知道「唔同受試者畀嘅學費金額唔同」呢一點。交咗學費之後，研究者就話畀佢哋知，原來佢哋嘅朋友咁啱又搵到一個唔使錢嘅課程（B），而且嗰個課程合格率仲有 85% 咁高；原則上，最理性嘅選擇係完全放棄課程 A 走去上課程 B，因為無論上邊個課程都係已經蝕咗課程 A 嘅學費，但上課程 B 合格率高啲所以比較著數；但實驗結果表明，有唔少受試者選擇繼續上合格率得 75% 嘅課程 A，而且畀咗貴學費（150 文美金）嘅受試者更加大可能會噉做。

一般認為，「已經交咗嘅學費」唔屬於啦更成本：想像受試者有嘅選擇：

• 揀上課程 A：無咗課程 A 嘅學費，合格率 75%
• 揀上課程 B：無咗課程 A 嘅學費，合格率 85%

即係話無論佢哋點揀，課程 A 啲學費都係無得返轉頭，所以呢項「成本」唔係啦更成本，一位理性嘅決策者唔應該將呢項成本納入考慮範圍內。

睇埋

• 機會成本