埋伏式捕食

一隻西部綠蜥埋伏隻蝗蟲。

呢段片拍歐洲螳螂（Mantis religiosa）；當中有幾段展示佢哋用「埋伏等獵物行近，再一嘢捉住獵物，途中冇追趕」噉嘅方法捕食。

埋伏式捕食（英文：ambush predation / sit-and-wait）係捕食嗰陣捉獵物嘅一種方法。

埋伏式捕食顧名思義係指「埋伏」隻獵物：採用呢種做法嘅捕食者通常有保護色或者類似能力，能夠輕易喺環境入面匿埋，令獵物探測唔到佢；而佢會匿埋喺佢獵物常去嘅地方，等有獵物靠到咁上下近，隻捕食者就會一嘢撲上隻獵物身上或者用第啲方法捉住隻獵物，途中完全唔會有「追趕」出現。

有好多物種嘅螳螂同埋蜘蛛都係靠呢種做法捕食嘅。

分類

• 「陷阱」：捕食者識得設「陷阱」，即係會建造某啲結構，獵物一旦進入陷阱就會被困，捕食者可以慢慢噉上前去殺同食獵物；例如蜘蛛喺呢方面就好出名，好多物種嘅蜘蛛都識得織蜘蛛網，用嚟整蜘蛛網嘅絲強韌又有黏性，蝴蝶、蜜蜂或者蜻蜓等嘅昆蟲成日會唔覺意飛飛吓撞到個網，一落咗網就郁唔到，於是乎速度唔快嘅蜘蛛可以捉住同殺死獵物。亦可以睇睇蟻蛉嘅捕食方法。
• 僞裝：捕食者個樣望落似環境入便嘅物件，獵物睇唔到捕食者，就會慒盛盛噉行埋捕食者嗰度；例如變色龍就出咗名曉變色，令自己望落似樹枝或者草，小昆蟲睇唔到變色龍就有可能會進入變色龍條長脷嘅「射程」，然後變色龍就會一嘢「射出」條又長又有黏性嘅脷，捉住隻獵物。
• 攻擊型擬態指捕食者扮成一啲無害嘅生物，令獵物肯行近；例子可以睇吓蘭花螳螂。

睇埋

• 追趕式捕食
• 攻擊型擬態
• 埋伏