捕食

上圖：單獨捕食－北極熊殺同食緊一隻海豹。
下圖：合作捕食－羣螞蟻殺同食一隻沙蟬。

捕食bou6 sik6（英文：predation），粵文又有叫獵食lip6 sik6，係生態學入面生物之間互動嘅一種方式。喺呢種互動方式入面，

• 互動嘅其中一方會去捉對方，殺死後者同埋將後者食落肚；
• 食對方嘅係所謂嘅捕食者（predator），而畀人食嗰方就係所謂嘅獵物（prey）。

如果有種生物 A 硬係會畀另一種生物 B 捕食，噉 B 就係 A 嘅天敵tin1 dik6（natural enemy）

狼、老虎、獅子同蜘蛛等嘅動物都係出名嘅捕食者。例如狼噉，狼硬係會（例如）捉同殺兔仔，殺咗之後將兔仔食落肚，狼係呢段關係入面嘅捕食者，兔仔係獵物，而因為狼硬係會捕食兔仔，所以狼係兔仔嘅天敵。

定義

隻寄生蜂（左）嘗試喺條毛蟲（右）身上生蛋；寄生蜂啲寄主會反抗，有時仲會喺反抗途中殺死隻寄生蜂。

响生態學上，要定義「捕食」呢隻詞查實有啲撈絞。

例子：寄生蜂
寄生蜂（parasitoid wasp）係指膜翅目細腰亞目當中好幾科嘅昆蟲；佢哋最出名嘅係會靠寄生嚟生存同繁殖－寄生蜂乸會將蛋生喺第啲節肢動物（寄主）體內，常見嘅寄主有毛蟲、甲蟲同蜘蛛呀噉；啲幼蟲出咗世就會食寄主嘅肉維生；當中有啲物種嘅寄生蜂幼蟲，仲會暫時留住寄主條命，甚至識得擾亂寄主嘅神經系統令寄主保護佢哋，寄主要等到啲幼蟲變咗成蟲先會死。一般認為，好似寄生蜂呢種寄生做法，理應要同「捕食」區分開。

2022 年嘅不列顛百科全書係噉描述 predation（捕食）呢隻英文字嘅：

「

原版英文："predation, in animal behaviour, the pursuit, capture, and killing of animals for food. Predatory animals may be solitary hunters, like the leopard, or they may be group hunters, like wolves." 粵文翻譯：捕食，喺動物行為上，係指追、捉同殺動物嚟食。捕食性嘅動物可以係獨行嘅，好似豹噉，又可以係成羣噉捕食嘅，好似狼噉。

」

一般嚟講，一串行為要有齊

1. 捉：捉一隻生勾勾嘅獵物，
2. 殺：自己親手殺死隻獵食，
3. 食：再食隻獵物嘅肉，

三步驟，先算得上係「捕食」－

• 狼捉、殺同食馴鹿等嘅多種哺乳類。
• 貓捉、殺同食老鼠等嘅多種嚙齒目。
• 蝙蝠捉、殺同食飛蛾。
• 白頭海鵰捉、殺同食多種嘅魚。
• 蛇捉、殺同食多種青蛙同雀鳥。
• 蜘蛛捉、殺同食包括蝴蝶同蜜蜂在內嘅多種昆蟲。
• 瓢蟲捉、殺同食蚜蟲。

... 呀噉。好似寄生蜂噉「捉第啲動物，但唔會即刻殺同食」嘅寄生行為，就唔合符上面對「捕食」嘅定義。

仲有一點要留意嘅係，捕食有異於食腐（carrion）：食腐係指食一啲已經死咗嘅生物；例如禿鷹就出嗮名成日會搵啲動物嘅死屍嚟食；嚴格噉講，捕食一定係特指有齊捉、殺、食三步嘅行為，而好似禿鷹噉嘅食腐行為，少噉咗捉同殺，定義上都唔屬於捕食。

一群禿鷹搵到隻鬣狗嘅死屍嚟食；喺班禿鷹嚟到之前，隻鬣狗已經死咗，班禿鷹並冇「捉同殺」隻鬣狗－班禿鷹做緊嘅嘢係食腐而唔係捕食。

點捉獵物

捕食者可以靠「用乜方法捉獵物」嚟分類。

追趕式

追趕式（pursuit）係最簡單直接嗰種捕食方法，指隻捕食者追趕隻獵物。如果隻獵物以直線跑，噉隻捕食者淨係需要跑得快過隻獵物，而如果隻獵物走佬途中掟彎，隻捕食者就要有夠快嘅反應更改自己路線；包括人類、狼、海豚、殺人鯨同埋蜻蜓都屬追趕式捕食者。追趕式捕食者有好多策略可以採用－

• 齋靠速度：如果隻捕食者跑得極快，啲獵物唔夠佢快，就會畀佢追到；例如獵豹（Acinonyx jubatus）就係出嗮名嘅純速度型捕食者，據報佢哋全力衝刺嗰陣速度可以去到成時速 93 km 咁高。
• 鬼祟接近：而家想像隻捕食者身上有保護色，獵物難以睇到佢哋，噉隻捕食者可以靜靜雞伏喺（例如）草入面行近獵物，等到距離有咁上下近，隻捕食者就一嘢開始追趕，就算隻獵物全速跑嗰時有能力擺脫隻捕食者，佢都有可能因為受到突襲而嚟唔切加到最高速，因而畀隻捕食者追到；好似老虎（Panthera tigris）就出名成日用呢種做法捕食。
• 成群追趕：狼（Canis lupus）出嗮名興成群打獵；齋講體能嘅話，狼冇獵豹咁快（狼全速跑嗰陣，速度據報頂嗮攏得嗰時速 64 km ），又冇老虎咁大隻；不過狼有一樣大優勢，就係好識團隊行動－想像家吓兩隻狼一齊追住隻駝鹿噉跑，一隻喺獵物左邊追，另一隻喺獵物右邊追，噉隻獵物轉左定轉右都會畀隻狼一嘢撲上去咬佢；而喺現實，狼往往會起碼三四隻一齊追住隻獵物嚟咬。

一隻全速衝刺緊嘅獵豹  一隻老虎匿埋喺植物嘅葉入面。  一群狼喺度圍攻緊隻美洲野牛。

• 堅持式（persistence）：會用堅持式策略嘅獵食者通常係跑得唔快，但耐力勁兼且有返咁上下聰明嘅；呢啲獵食者冇能力齋靠速度捉住獵物，所以打獵嗰陣佢哋會靠跑一陣行一陣嘅移動模式，跟實喺隻獵物身後唔遠嘅地方；呢啲獵食者跑唔快，途中可能會畀隻獵物走甩一陣，但佢哋夠聰明，好快就可以靠跟住隻獵物嘅腳印或者留低嘅大便等嘅痕跡追上去－呢點令到隻獵物冇得唞要係噉走佬；於是乎，呢啲獵食者就一路係噉跟住隻獵物，跟成幾個鐘頭咁耐嘅時間；因為呢啲獵食者耐力好，所以最後最先會攰到走唔郁嘅會係隻獵物－而等到隻獵物走唔郁嘅時候，啲獵食者就可以上前去殺死隻冇力反抗嘅獵物。人類就出名會用呢種策略打獵。

埋伏式

呢段片拍歐洲螳螂（Mantis religiosa）；當中有幾段展示佢哋用「埋伏等獵物行近，再一嘢捉住獵物，途中冇追趕」噉嘅方法捕食。

埋伏式（ambush / sit-and-wait）顧名思義係指「埋伏」隻獵物：採用呢種做法嘅捕食者通常有保護色或者類似能力，能夠輕易喺環境入面匿埋，令獵物探測唔到佢；而佢會匿埋喺佢獵物常去嘅地方，等有獵物靠到咁上下近，隻捕食者就會一嘢撲上隻獵物身上或者用第啲方法捉住隻獵物，途中完全唔會有「追趕」出現。

有好多物種嘅螳螂同埋蜘蛛都係靠呢種做法捕食嘅。

數學模型

• 洛卡-伏塔拉方程式

睇埋

• 成群打獵
• 食肉動物
• 食物鏈（頂級獵食者）
• 反捕食者適應

拎

• Predation. Encyclopedia Britannica.