R/K 選擇理論

鯨魚一次繁殖淨係會生一隻後代，而且隻鯨魚乸仲會花好多時間同心機照顧隻後代。

R/K 選擇理論（粵拼：R/K syun2 zaak6 lei5 leon6；英文：r/K selection theory）係生態學同進化方面嘅一套理論。根據呢套理論，响物競天擇之下，一隻生物物種生後代嗰陣一係重視數量一係重視質素，而呢樣差異會令到隻物種跟住出現一大拃相應嘅特質。

R 選擇

睇埋：單次繁殖

如果一種物種生後代嗰陣係重視數量（策略），即係話種物種一吓過會生好多後代，例如八爪魚噉，八爪魚一次會生閒閒哋數以萬計嘅後代，而呢點表示呢種物種會有以下呢啲特質（策略引起嘅特質）：

• 父母唔會點樣照顧啲後代，
• 啲後代會生得快，
• 體型通常比較細，
• 通常比較短命，

呀噉。呢啲動物喺食物鏈入便嘅位置通常比較低。

大多數物種嘅昆蟲都係噉：蝴蝶、飛蛾同蟬等都係一次過生數以百計甚至千計嘅蛋，但係父母生完冇幾耐就會死，而且啲幼蟲會受到雀鳥同螳螂等嘅動物侵襲，生存率好低，可能每 100 條幼蟲得一兩條可以生存到去變成成蟲。

K 選擇

睇埋：多次繁殖

如果一種物種生後代嗰陣係睇重質素（策略），即係話呢種物種一吓會生好少嘅後代，例如貓一次只會生幾隻或者鯨魚一次生一隻噉。而呢點表示呢種物種會有以下呢啲特質（策略引起嘅特質）：

• 父或者母（甚至父母一齊）會落力噉照顧後代、
• 啲後代會生得慢、
• 體型通常比較大
• 通常比較長命...

呀噉。呢啲動物喺食物鏈入便嘅位置通常比較高。

體型稍為大啲嘅哺乳類傾向係 K 型物種。例如狗、狼同人類等都係一次生一個至幾個仔女，生完之後父母會畀好多心機照顧啲仔女，而且佢哋喺生態系統入面「地位比較高」，唔似得（例如）昆蟲或者大鼠噉，大量嘅仔女會畀捕食者殺死。

呢幅相影到一隻大鼠乸同埋佢嗰竇幼鼠；大鼠每次生仔女都會生一大竇，啲幼鼠會喺幾個月內快速長大，同時佢哋喺食物鏈入便位置低，有好多大鼠都會畀貓或者鷹等嘅獵食者殺死。好似大鼠噉嘅生命週期，被指係偏向 r 型物種。

睇埋

• 獵食者
• 食物鏈
• 物競天擇