刺激 (心理學)

古典制約實驗嘅圖解

喺心理學同神經科學上，刺激，粵拼：ci3 gik1，參見英文：stimulus，係可以指任何能夠引起生物嘅感官或者行為反應嘅物件或者事件。刺激可以係感官性質，例如光、聲、氣味等，亦可以係心理性質嘅，例如記憶。心理學家成日都會研究刺激，想探討唔同類型嘅刺激點樣影響行為同埋情緒。

概論

睇埋：認知同刺激-反應模型

以下係刺激嘅一啲例子——

• 感知：當光照入人嘅眼，光會扮演刺激嘅角色，視網膜入面嘅感光細胞會活化，經過視神經傳去腦嘅視覺皮層，令人睇到顏色、形狀同郁動等嘅特性。心理學上研究感知刺激，就係探討光同聲等嘅物理刺激點樣由個腦轉換成主觀經驗。
• 情緒：假設有人忽然喺背後俾人拍膊頭，呢個突如其來嘅事件好可能會引發驚嚇嘅反應；個腦嘅杏仁核會活化，心跳加快、唞氣變急，身體進入準備應對嘅狀態。
• 由純行為噉睇：想像擺隻老鼠喺實驗箱裡便，箱中有個掣,每次撳掣隻老鼠就有嘢食。撳掣係一種行為，而食物就係一個正向刺激，會強化老鼠撳掣嘅行為。研究者可以透過控制刺激（例如食物出現與否）嚟觀察行為點樣隨住所得而改變。

學習

睇埋：學習同行為強化

學習相關嘅研究，成日用到刺激呢個概念。

古典制約係心理學入便嘅經典現象。實驗顯示，狗唔單止見到食物嗰陣會流口水，就算聽到餵食前響起嘅鐘聲，都會出現同樣嘅反應。呢種現象，由原本中性嘅刺激（鐘聲）同一個自然引起反應嘅刺激（食物）反覆配對之後，令到中性刺激都可以引起相同反應（流口水），謂之古典制約。古典制約涉及幾個基本元素：

• 無條件刺激（US）：自然會引起反應嘅刺激，例如食物；
• 無條件反應（UR）：對無條件刺激自然出現嘅反應，例如流口水；
• 制約刺激（CS）：原本中性、但經過重複配對之後會引起反應嘅刺激，例如鐘聲；
• 制約反應（CR）：對制約刺激出現嘅學習反應，例如聽到鐘聲就流口水。

古典制約展示咗學習可以透過「聯想」嚟形成。

睇埋

• 動物行為
• 動作電位
• 反應時間
• 活化
• 感官超載