大中華膠
大中華膠，又叫大中華撚或者大中華閪，係指自發擁護大中華主義或者中國共產黨嘅華裔網民。呢個詞語含有貶義，特別喺馬來西亞同新加坡華人群體入面被廣泛使用[1]。其中「膠」係指言論上違反邏輯常理，傾向強迫其他人必須自認為係中國人或者中華民族，具有強烈嘅佔有欲，將唔同國籍甚至民族嘅人含糊其辭混為一體，籠統叫做中華民族。代表言論有「你換邊個國籍都改變唔到你身體入面流住中國人嘅血」、「身為華人就一定要支持中國」等，活躍喺全世界各地嘅中文網絡評論區。
佢哋唔一定擁護社會主義或者共產主義，但大多都係中國共產黨或者中國國民黨嘅支持者，因為佢哋認為呢兩個黨比起其它中國政治勢力更傾向支持一統中國嘅理念。
起源
[編輯]「中華膠」一詞乃衍生自香港網民所講嘅「左膠」，意思係太強調左派理想主義，甚至個腦思維僵化，其中「膠」源自香港網絡術語「硬膠」，而「硬膠」係廣東話粗口「戇鳩」嘅諧音，帶有愚昧嘅意思[2]。
演變
[編輯]中華膠嘅起源最早可追溯去到清末民初，華人遠赴海外嗰時，海外落地生根嘅華人（包括華僑），依然對中國抱有一種特殊「中國情結」（或者叫大中華主義）嘅意識型態。唔同中國民族主義主張係所有中國國籍嘅各民族人民都係中華民族一份子，又嚮往中共治理文化嘅人[3][4]。
而部分華人喺面對好多種族唔平等同歧視嘅環境入面，產生寄望一個外在強大嘅中國嚟保護自己嘅心態，同埋近年中國嘅崛起同向外擴散影響力嘅因素，產生咗民族自豪感，又稱之為「大中華情結」[3][4]。
隨住網絡時代同全球化嘅到嚟，網絡資訊受到各種中共統戰宣傳影響，導致網友好容易吸收呢啲意識型態思維（參見中港矛盾），產生盲目誇大中國（中共）嘅好處並且為佢嘅言論護航[5]。
直到2019年，香港爆發大規模嘅反逃犯條例修訂運動，香港同星馬地區嘅網絡上面爆發兩派立場對立嘅網友，發表大量支持同反對嘅言論[6]。部分網友亦配合中共大外宣政策，發表喺政治上傾向中國政府同中國共產黨言論，盲目咁誇大中國嘅好處[7]，呢啲人士被稱做「中共膠」[8]。
睇埋
[編輯]攷
[編輯]- ↑ 許劍虹。〈許劍虹觀點：星馬地區「大中華膠」—從辛亥革命到馬共崛起〉。喺2022-04-05搵到。
- ↑ 杜晉軒 (2020-05-27)。〈「大中華膠、慕洋犬、廢青」這不是談香港，而是分裂中馬來西亞華人網民世界〉。《The News Lens 關鍵評論網》 (臺灣中文)。原先內容歸檔喺2020-11-21。喺2020-11-01搵到。
- ↑ 3.0 3.1 〈大馬"中華膠"由來(上篇)/廖珮雯〉。www.enanyang.my (簡體中文)。2019-08-08。喺2020-10-28搵到。
- ↑ 4.0 4.1 〈大馬"中華膠"由來（下篇）/廖珮雯〉。www.enanyang.my (簡體中文)。2019-08-09。喺2020-10-28搵到。
- ↑ 〈鄭博夫：嚴防統戰思想蠱惑國民〉。《東方網 馬來西亞東方日報》 (簡體中文)。原先內容歸檔喺2020-11-05。喺2020-11-01搵到。
- ↑ 〈解析大中華情結 | The Malaysian Insight〉。www.themalaysianinsight.com (中文)。原先內容歸檔喺2020-10-31。喺2020-10-28搵到。
- ↑ 〈中华胶不胶：论马来西亚华人的大中华民族主义意识 | 林韦地 | 分享〉。《访问 The Interview》 (中文)。原先內容歸檔喺2020-11-07。喺2020-10-28搵到。
- ↑ 庄仁杰 (2020-06-14)。〈庄仁杰：中共胶与假中立之恶〉。《馬來西亞東方日報》 (簡體中文)。喺2024-04-08搵到。