如心廣場

出自維基百科,自由嘅百科全書
跳去: 定向搵嘢
重起緊嘅如心廣場

如心廣場香港荃灣一對地標摩天大廈,係全新界最高嘅。如心廣場有兩棟樓,矮嗰棟42層叫Nina Tower,高163.7米,係酒店來;高嗰棟80層叫Terry Tower,高318.8米,其中30層係甲級寫字樓,淨返就係酒店。兩棟樓代表華懋集團老細龔如心(Nina),同佢個畀人綁架失蹤多年嘅老公王德輝(Terry),中間有一條玻璃天橋連接,寓意夫妻手牽手永不分離。不過唔理高低,成個建築叫如心廣場,而英文就叫Nina Tower。不過,雖然棟樓都差唔多起好,但係重未入伙。龔如心等唔到呢一日,就響2007年4月3號病死,睇唔到佢開張。

如心廣場塊地響楊屋道八號,荃灣市鎮地段353號,係填海填出來。成塊地面積有成21萬平方呎。起好之後,成棟嘢有成280萬平方呎。

[編輯]

荃灣海皮棟咗支如心廣場(右面)

其實如心廣場原本設計唔係咁。原本打算用80億港銀起108層高,有成520米,要高過吉隆坡雙子塔,會係世界至高嘅樓。外表金光閃閃,上面重諗埋掛We love Hong Kong。起嘅原因係華懋雖然係香港大地產商,不過起親多數都係新界中低價住宅樓,冇自己嘅地標。華懋趕住1997年前用晒乙種換地權益書,所以就1993年用晒佢來換荃灣呢塊地。加上見到信和集團新源基地產夾分起嘅地標中環廣場,唔響中環都一樣咁掂,華懋都可以響荃灣有樣學樣,起個地標帶動周邊發展。不過呢個起世界至高地標嘅算盤打唔響,因為中英政府1991年好快就決定要響赤鱲角新機場,而荃灣上空響正航道,香港政府1995年1月決定唔畀佢起咁高,最多只可以起324米。因為佢唔可以喺1996年起好樓,畀政府罰咗5.5億,向法庭上訴都係維持原判。最後1997年都係要設計過,拆開兩棟,好似而家咁,2000年2月政府先准佢起。

裏面[編輯]

如心廣場底有巴士總站同其他公共交通,2000年已經起好。

出面網頁[編輯]