妖
妖（粵拼：jiu1）係指低級層次嘅靈異物體，介乎魔同鬼之間，唔可以進入神氐嘅國度，只能夠喺人間活動同修練嘅精靈鬼怪。佢哋多數係動物死後嘅精元，喺機緣巧合之下得到仙氣而變成；又或者係一啲物件吸收咗長年累月嘅日月精華，累積咗一縷精元而成為妖精。佢哋多會施展一啲大小法術，視乎修練嘅程度而定。
妖精當中，有啲得到神氐嘅感化，積極咁渡上千年萬年嚟潛心修練，最終能夠得道成仙，進入極樂；但係有啲妖精則淨係鐘意喺人間搞搞震整蠱人，鍾意將人間搞到天翻地覆，有啲重衰到淪為俾惡魔級鬼怪差遣，助紂為虐，務求令到人類雞犬不寧為最終嘅目的。
傳說[編輯]
人間嘅妖有好多傳說，喺日本更加係數之不盡，用佢作為漫畫而出名嘅有《鬼太郎》。
「狸貓」
- 日本妖精當中，以「狸貓」最為日本人所鍾愛，佢哋本來係狸類嘅動物，機緣之下得到仙氣而變成妖精；佢哋靠一塊樹葉就可以變呢變路，真係天馬行空乜都得咁滯。搞到當今嘅日本動畫大師高畑勳都要將佢發揚光大，拍攝咗一輯動畫叫做《百變狸貓》，片中嘅一班狸貓團結合力來排除萬難，好鬼正面，因此狸貓更受大家所鍾意。
「狐妖」
- 其實喺日本抑或中國，妖精嘅傳說都可以話好多好多，當中最鍾意搞鬼最出名嘅可謂「狐狸精」嘞，佢哋鍾意喺夜晚勾引嗰啲喺森林中迷路嘅男人，吸盡佢哋嘅精元，用嚟補充妖精所需要嘅元氣。有一本流傳咗好耐嘅中國民間傳說，由蒲松齡所撰寫嘅《聊齋誌異》，就將狐狸精嘅所作所為描繪得淋漓盡至。其它以狐妖作為題材嘅書籍更加係多不勝數。
- 香港都曾經傳過話有狐妖喺市區作怪，曾幾何時喺中區某商業大廈地下嘅雲石外牆上就現出過幾個狐狸頭嘅紋理圖案，睇到嘅人都覺得好詭異，再加上啲傳媒廣泛報導同埋渲染，繪形繪聲咁，使到單嘢愈吹愈勁，成為城市中一時無兩嘅靈異頭條。
「蛇精」
- 蛇類成精亦都係中國民間傳說嘅熱門。蛇精都好鍾意用美色嚟迷惑男人，吸取佢哋嘅陽氣精元嚟強大自己嘅法力，達到魔嘅境界。
- 蛇不嬲都俾人冷酷無情嘅感覺，詭異嘅眼仔加埋吐吓吐吓嘅分叉脷，絕大多數人都覺得蛇只會係醜陋邪惡，冇乜可愛美麗嘅地方，但係原來蛇一旦成咗精，竟然會變成好似天仙下凡咁靚嘅美女，令到凡間嘅傻仔神魂顛倒，都真係可以反映到世界上有好多事都有可能係佛口蛇心，體現咗外表同個心相反嘅一大諷刺。
- 但係若果話所有妖精都係壞蛋冇好嘢，又似乎有啲不公平咁，因此有文學家就為妖精創作出一段段整到好鬼凄美嘅人鬼愛情故事。用凄美嘅人鬼戀做題材嘅作品，最有名嘅梗係要數《白蛇傳》啦，許仙同白素素（白蛇精化身）嘅愛情故事都不知迷倒過幾多人嘅心靈，重被公認為文學藝術上嘅一大名著添。
「樹妖」
- 大樹林立嘅森林往往俾人有啲陰森可怖嘅感覺，尤其是喺夜晚行入去濃密嘅樹叢裏面，風一吹過就好似俾很多會郁嘅樹木包圍咁，因為咁民間流傳關於樹妖嘅傳說都有好多，有啲甚至講到真嘅一樣。
- 1987年，香港有一套叫《倩女幽魂》（出自蒲松齡所撰寫嘅《聊齋誌異》）嘅古裝電影，故事主要係講述男書生同女鬼嘅愛情故事，但係當中郤有關於樹妖嘅描繪。故仔裏面，一個名叫寧采臣嘅戇直書生喺荒山嘅森林裏面迷鬼咗路，居然俾佢遇到鬼魂聶小倩，重迷惑咗佢。而聶小倩呢隻鬼魂就係由一棵俾眾鬼尊稱為姥姥嘅樹妖所控制。因為樹妖姥姥要增強法力同埋要定時補充精氣，於是經常差遣聶小倩同埋其它小鬼去將啲精壯男子勾引到佢座下，然後將啲男人嘅精元吸乾。
- 最初嘅電影版本係由已經仙逝咗嘅歌影巨星張國榮同埋當時嘅影壇玉女王祖賢拍檔合演。後來因太受大眾歡迎，所以電視台就將佢拍成電視連續劇，重搵咗靚仔歌影紅星陳曉東飾演寧采臣添。
「石敢當」
- 關於石敢當嘅傳說有好多，而家最人所週知同埋聽過嘅，應該係呢個「泰山石敢當」。
- 不過講到物件成精呢回事，「石敢當」原來都有咁樣樣嘅得意傳說：石敢當原本係山上嘅一塊巨型石頭，村民見到舊石咁鬼大，覺得佢有幫條村阻擋邪魔煞氣嘅氣勢，於是就喺塊石上面雕刻上「石敢當」三個字，當係一個稱呼咁啦，但係嚿大石因為長年咁吸收日月精華，之後竟然成咗精，重識行識走識講嘢。最初佢唔識好壞就俾惡魔梭擺咗，叫佢將路經嘅人磧死，咁啲惡魔就可以吸納死人嘅靈魂精元，後來嚿大石精受到仙人嘅點化，潛心修道，重幫人類擋晒啲惡魔邪神嘅騷擾，最後就修正果，得道成仙嘞。
- 姑勿論啲傳說係點嚟嘅，佢嘅用途係用嚟鎮煞擋邪呢個就人人都知；從古時開始，啲人已經將石雕嘅石敢當放喺屋企或者庭園裏面，用嚟鎮妖降魔，最緊要係保護到家宅嘅安寧啫。
其實妖嘅種類數都數唔晒，以上只係舉出其中嘅幾種啫，每一種妖都有佢哋自己嘅故事，有興趣可以自行去參考有關嘅書籍或者相關嘅網站。
引申[編輯]
妖，有令人迷惑，鬼怪異類嘅感覺，因此亦引申出一啲形容詞彙，好似：
「人妖」
- 即係明明係男性，郤鐘意裝扮成女性咁，有啲甚至將上半身嘅性徵用整形嚟突出，但係下半身就重保有原本嘅性徵，呢類人嚟講都被統稱為「人妖」。若果要計算人妖數目同地區人口嘅比例，咁就肯定係泰國最多。
- 注意，呢個詞語只係適用於男性扮成女嘅情況，如果要形容女扮男裝，一般人會用「男人婆」，呢個係暫時唯一嘅中文形容詞，但係就唔多唔少有唔係幾尊重嘅感覺，因為咁有人就索性以「ＴＢ」作為對鐘意女扮男裝嘅人嘅稱呼（ＴＢ，即係 Tom Boy 嘅英語縮寫），雖然都重係有唔尊重嘅感覺，但係就已經成為俾廣大嘅人所接受同採用，因為感覺上比較有文化啦話晒用英文，同埋冇咁礙耳。
「小妖精」
- 呢個詞語通常用嚟形容嗰啲好鬼得人喜愛，好識得討人歡心嘅女仔。唔一定係話差嘅意思，相反有好多女仔都好鐘意俾人咁樣叫法，可以得到啲男人鐘意，梗係可愛動人啦，點都唔會係差啩。當然嗰啲俾「小妖精」迷惑嘅丈夫，佢哋屋企嘅老婆絕對唔會認為「小妖精」係可愛囉。
「妖艷」／「妖媚」／「妖冶」
- 形容一啲人打扮到好鬼花姿招展，面上好多嘅化粧，將個樣整到邪邪哋咁，好似要迷惑眾生咁嘅款，就可以哩詐詞語去形容佢。
- 妖艷嘅打扮曾經喺七八十年代瘋魔過全球。當時喺香港就有兩位已經仙逝嘅歌手曾經以妖艷打扮及舞蹈而聞名；佢哋試過同台大鬥妖艷舞蹈而成為佳話，佢哋就係：被稱為妖冶鼻祖嘅星級男歌手羅文，同埋走妖艷路線而紅透半邊天嘅星級天后梅艷芳。要數當時喺國外出名嘅妖艷歌手就有：曾經瘋魔一時嘅男歌手佐治童子（Boy George），而喺日本方面嘅代表則有澤田研二，就連香港嘅名藝人鄭少秋當時亦跟佢風同埋改篇佢嘅歌嚟唱。
「妖言惑眾」
- 係話某人講咗啲迷惑群眾，用嚟達到某啲目的或者利益嘅說話。呢啲話就好似妖精嘅詛咒咁，啲人好易就相信同埋跟隨嚟到成就一啲結果，而且多數係壞嘅結果。舉個例咁講：一條村裏面突然落咗一連幾日嘅豪雨，引發山泥傾瀉、嚴重水浸等大災難，咁有人出嚟話呢啲係觸怒神靈嘅天遣，要民眾籌集金錢嚟舉行祭天大典，先可以平息災難；表面話就話係祭神，實際上就係借人心惶惶嚟搜括金錢，呢種做法就可以稱為「妖言惑眾」。
「妖道」
- 修道嘅人，難免當中會有人行差踏錯走咗去邪途，用茅山法術嚟來作惡，或者假借道學嘅名義嚟騙取金錢同埋利益，啲人就會叫佢做「妖道」。呢個詞語多數出現喺啲民間小說嘅故事之中。