孖胎悖論（粵拼：maa1 toi1 bui3 leon6；英文：twin paradox）係有關狹義相對論時間膨脹嘅一個悖論。
如果家陣有對孖生兄弟，阿快同阿慢，阿慢留喺地球，而阿快就坐住超級太空船以光速 99.9% 咁快嘅速度飛去南門二（距離地球大約 4.3 光年咁遠嘅一個恆星系統）嗰度再飛返地球；到底阿快返到地球嗰陣，邊個會老啲（過咗嘅時間多啲）呢？原則上，阿慢係停喺地球上唔郁，但係由阿快嘅角度望，佢可以話阿慢同地球先至係以接近光速嘅速度飛離佢嗰一方。
不過要留意，喺呢個情況下，阿快飛離地球再回航，表示佢實係有非零嘅加速度，所以佢唔係一個慣性參考系。
