字母順序
字母順序（英文：alphabetical order）嘅排列，指按照某種語言嘅正常字母次序決定一榨字應該點樣排法，唔同語言次序唔同，例如雖然英文同愛爾蘭文都係用羅馬字母，佢哋嘅字母係唔同次序嘅。
排次序並唔係淨係排啲字嘅第一個字母，而係如果第一個字母一樣（唔理大細楷），就要排第二個字母，如此類推。例如，如果係英文，cat、car 就係唔啱次序，雖然第一個字母一樣。
複合字嘅處理
[編輯]如果隻語言用到空格或者連接號，遇到有複合字，傳統上有兩種排法；美國嘅 NISO（國家資訊標準組識）有正式標準，編號 TR03，指明連接號、破折號同斜線當空格處理，其他標點就當冇到，淨返有空格嘅字就分兩種做法[1]:114：
- 唔計空格（英文：letter-by-letter）：當空格冇到，成個複合字當做一串好長嘅字母，跟上述方法排
- 計埋空格（英文：word-by-word）：兩個複合字第一部份跟上述方法排，一樣次序嘅話第二部份跟上述方法排，如此類推（TR03 指出如果用電腦做，只要將空格排喺所有嘢之前就做到爾種效果，唔使咁麻煩[1]:114）
兩種排法都係傳統排法，冇話邊隻啱啲，不過某啲書種可能慣常用其中一種（例如，字典同百科全書通當唔理空格[1]:127），或者相關機構（例如出版社、大學學系或者公司內部等等）可能有規定。
另外亦會有人就咁按電腦內碼排，但係咁排並唔正統，排出來嘅次序好易會錯。
忽略字
[編輯]跟字母順序排次序嘅時候往往有啲字如果喺開頭習慣上會唔計，爾啲通常包括冠詞等等。喺電腦度就會當鏟走咗，爾啲當鏟走咗嘅部分叫忽略字。
棘手問題
[編輯]跟字母順序排次序，可能會遇到一啲棘手問題，例如：
- 數字：有啲情況會排數目大細，第啲情況會當個數字串咗出來當字咁排[1]:134，最緊要係讀者會覺得合理
- 符號：按情況，可以唔理符號、當個符號嘅名串咗出來、當個符號代表嘅字串咗出來、跟電腦內碼排等等[1]:138–142
- 簡寫：可以當個正寫串咗出來，或者就咁跟簡寫排[1]:163
因為處理方法好多時會牽涉到 ｢睇情況｣，電腦可能唔可以自動處理，人手介入可以係指定 sort key（排序鍵），即係如果可以嘅話，可以話畀部機知排次序嘅時候唔好理個字點寫，人手輸入嗰個版本先算數。
例
[編輯]唔計空格同計埋空格嘅分別
[編輯]如果有爾啲英文字：car phone、carboy、car、carmine
- 唔計空格，順序係：car、carboy、carmine、car phone
- 計埋空格，順序係：car、car phone、carboy、carmine
忽略字
[編輯]如果有爾啲書名：The Typographic Grid、Telecommunications Primer、The Canadian Style
- 正確處理忽略字，順序係：The Canadian Style、Telecommunications Primer、The Typographic Grid
- 就咁跟內碼排，順序係：Telecommunications Primer、The Canadian Style、The Typographic Grid（傳統上算錯）
簡寫
[編輯]如果有爾啲加拿大地名：Saint John、St. John’s、St-Jean（魁北克省法文地名）
- 當串咗正字出來，順序係：St-Jean、Saint John、St. John’s
- 就咁跟簡寫排，順序係：Saint John、St-Jean、St. John’s
數字
[編輯]如果係爾啲書名：Animal Farm、1984、No!、New、100%
- 按數字大細，字母先過數字，順序係：Animal Farm、New、No!、100%、1984（如果唔知書名點寫，都算合理）
- 當數字寫咗英文全寫，順序係：Animal Farm、New、1984、No!、100%（如果講英文，都算合理）
不過如果係產品型號，例如爾啲：K-r、K-50、K-100D、K-1
- 按數字大細，數字先過字母，順序係：K-1、K-50、K-100D、K-r
- 當數字寫咗英文全寫，順序係：K-50、K-1、K-100D、K-r（唔合理）
- 就咁按內碼排，順序係：K-1、K-100D、K-50、K-r（唔合理）