連接號

  提示：呢篇文講嘅唔係破折號。

連接號（法文：trait d’union，意思係 ｢連接號｣；英文：hyphen，用來連接兩個數值嘅時候叫 dash）係連接兩組字嗰時用嘅標點。佢嘅基本形狀係短橫線，但係文法上嘅連接號會按唔同嘅情況出現唔同嘅實際形狀。

連接文字

連接文字嘅時候，連接號嘅基本形狀係一個字空位嘅橫線，喺中文係 ｢－｣，喺英文係 ｢-｣。

喺英文排版，如果被連接嘅其中一個字入面有空格，連接號傳統上會用半形橫線（en dash）代替，理由係英文嘅連接號好多時其實窄過一個英文空格（兩個其實通常都係大約四分一正方，但係如果右便排齊邊，空格就會變闊），改用半形橫線望落會冇咁誤導。但係呢個傳統報紙通常唔會跟。

連接數值

喺連接數值嘅時候，中文可以用一個字空位嘅橫線或者波浪線（~）。

英文排版目前嘅正規做法係將連接數值嘅連接號排成半形橫線（en dash），一般亦都會叫佢做 dash 而唔叫佢做 hyphen，但係喺一般打字同某啲格式（例如美國心理學會格式或者加新社格式）仍然都係用 hyphen。至於波浪線，就曾經係一個可能嘅做法，可以喺二十世紀初嘅海報見到，但係而今已經冇人用，冇漢字文化背景嘅人亦都一般唔會睇得明。

連接地名

連接相闗嘅地名嘅時候，中文可以用一個字空位嘅橫線或者兩個空位嘅橫線。

英文排版亦都係有兩個做法，可以排成 hyphen 或者 en dash。

其他樣

爾個招牌第一行喺尾嗰個兩劃打斜嘅就係連接號嘅舊式寫法

以前啲書仲係手抄嗰陣，西方早期嘅連接號本來其實係打斜嘅，但係因為好容易同逗號搞亂，好多時都會寫兩劃，而字型設計師亦中意打斜嘅連接號，因為冇咁悶。

喺手寫做校對嗰陣，代表連接號嘅符號亦係兩劃（⹀）。