審死官 (1992年電影)

出自維基百科,自由嘅百科全書
(由審死官 (電影)跳轉過嚟)
其他嘅審死官嘅文。
經過重新加工嘅《審死官》劇照

審死官》(Justice, My Foot!)係套1992年港產片

電影資料[編輯]

制作[編輯]

電影小介紹[編輯]

呢套戲其實係將舊有黑白港產粵語片嘅《審死官》舊戲新拍,除咗戲名一樣之外,故事橋段基本上亦都大致相同,甚至劇中嘅配角人物名同埋某啲對白都一模一樣,當然新版裏面亦都有啲新加同埋改篇咗嘅橋段穿插住,可以切合返現今戲劇嘅主流元素。

以前嘅主角宋世傑係由粵劇大佬倌馬師曾所飾演,喺而家呢套周星馳做嘅新版本裏頭都可以見到佢嘅肖像;可以留意吓呢套新嘅《審死官》,宋世傑屋企祖先靈位上面擺放咗兩幅祖先大相(畫),其實相中人(兩幅係同一人嚟,不過整到一男一女)就係嗰位粵劇大佬倌馬師曾,咁樣嘅安排,算係制作人員對前輩嘅一點致敬。

至於呢套戲嘅原本劇目,係嚟自京劇劇目:《四進士》。


劇情大綱[編輯]

故事係以中國清朝做背景,嗰時嘅官場貪污成風,只要有錢,做咗壞事都可以甩身,而且好多時因為利益而官官相衛;呢套戲就係要諷刺呢種禍國害民嘅風氣。

宋世傑係一個秀才,同時亦係專門替人打官司嘅狀師,因為佢嘅口材了得,所以俾人稱為可以死都拗返生,鬈都拗返直嘅「省城第一狀師」;佢出馬嘅官司逢打必贏,但係為咗佢可以揜住良心,於是喺有錢就惡晒嘅時代之下,佢亦願意做幫兇替嗰啲明明犯咗罪嘅人脫身,所以一直以來好多達官貴人做咗壞事想脫罪都會搵佢出馬,佢亦因為咁而賺錢賺到盤滿砵滿。

不過宋世傑每次幫啲大壞蛋打贏一次官司,佢出世冇耐嘅仔就會因為天遣夭折,或者因意外,前前後後都有十幾個仔女因為咁而死咗;但係打官司係佢嘅專長,而亦都冇人會嫌腥,所以就算係咁佢都繼續幫壞人脫罪;直到有一次,佢幫一個殺咗人嘅有錢仔打贏咗件官司之後,返到屋企得知佢未滿一歲嘅仔因意外死咗;天遣再次發生,又再有喜嘅宋夫人於是迫宋世傑封筆唔再幫人打官司,轉而開咗間客棧(即係酒樓旅館)。

開客棧嘅同時,宋夫人亦都有幫手上山擺茶亭,為路過出入嘅人贈上茶水解渴;有一次,大咗肚嘅宋夫人喺茶亭聽到一對兄妹對話,原來嗰個同樣大住個肚嘅妹妹楊秀珍嘅老公喺家鄉被人毒死咗,因為懷疑係佢老公個阿哥做嘅,一時唔知點算,於是同二哥楊勉走佬出咗嚟;兩兄妹加埋宋夫人幾個傾傾吓,咁啱遇到佢二哥嘅同姓兄弟楊青路過,楊二哥即刻上前拉開楊青傾密計,原來二哥走去呃呢個喪妻冇耐嘅楊青,話阿珍係佢唔同姓嘅女,可以賣畀楊青做繼室,諗住甩低個妹自己走佬,楊青諗住有人照顧吓兩個仔都好,於是就應承咗,而楊二哥收咗錢就拿拿林雞咁腳走咗去;後來楊青搞清楚發生咩事之後就即刻去追楊勉,追到山崖嗰陣,楊勉失足就跌死咗,而成個過程就俾微服出巡嘅巡案大人目睹,為咗証明楊勉嘅死係唔關楊青事,於是巡案大人就畀咗把私人紙楊青做信物,話如果有人怪罪就拎出嚟做証;楊秀珍見二哥咁耐唔返,無奈咁就跟咗宋夫人返咗宋府暫住。

回府冇耐,得知楊二哥跌死咗,楊秀珍傷心到暈低,跟住轉個頭個仔重出埋世,喺覺得自己無親無故又孤兒寡婦嘅困境之下,諗住吊頸死咗去算,點知俾宋夫人救返落嚟;宋夫人因為覺得楊秀珍好可憐,決定要佢老公宋世傑出山,為阿珍個老公雪冤,但係宋世傑就點都唔肯,因為佢喺封嗰日曾經發過毒誓,如果再拎起支筆寫字就生仔冇啫啫;於是宋夫人就自己寫狀詞去告官,點知唔識字嘅宋夫人寫埋晒啲圓圈交叉,俾個新上任嘅知縣兼放何汝大玩返轉頭,為咗要同其他俾宋世傑玩過嘅官員出氣,於是反而判咗宋夫人施以掌咀之刑;宋世傑眼見自己老婆俾人咁玩法,於是決定重出江湖為楊秀珍申冤。

當時因為宋世傑將支搵食筆封咗喺風水牌樓嘅牌匾上面,啲鄉親父老因為怕攞返支筆落嚟之後會影響風水,於是大力禁止,不過都難唔到武功高強嘅宋夫人,終於幫宋世傑攞返支筆落嚟,重畀咗一車黃金嚟到封住班鄉紳嘅

攞返支筆嘅宋世傑即刻搵新任知縣何汝大復仇,以口材令到何大人受理呢單案件。當身在山西姚田氏夫婦(楊秀珍老公嘅阿哥同阿嫂)得知楊秀珍喺廣州告官,於是即刻搵田氏做山西布政嘅阿哥出馬,重搵人落廣州四出疏通希望可以贏得官司而脫罪;到升堂嘅時候,知縣何汝大因為俾宋世傑玩到暈,於是就搵咗身為大學士嘅其中一位鄉紳將宋世傑嘅功名革除,收返佢秀才嘅身份;宋世傑冇咗秀才嘅身份,即係同一般平民冇分別,於是何汝大就搵藉口嚟盡情咁折磨宋世傑,判佢打一百大板,重要押枷鎖遊街同埋收監。當一大班官兵押住宋世傑遊緊街嘅時候,姚田氏夫婦派嚟嘅殺手突然殺出要追殺宋世傑,宋夫人為救夫君,使出生平絕學峨眉劍法嚟抵抗,點知突然作動頂唔住,好彩呢個時候楊青趕到,打走晒班殺手救返宋世傑。

後來楊青去監牢探宋世傑,宋世傑得知楊青身上有把巡案紙扇,於是血書喺紙扇上面,托楊去搵清如水明如鏡嘅八府巡案嚟主持哩呢單案;冇幾耐宋世傑喺監牢入面再俾姚田氏夫婦派嚟嘅人暗算,搞到精神失常做出反常嘅行為,知縣何汝大見佢搞成咁,於是下令放走宋世傑,查封佢全家,要佢哋即日離開省城。

經過一輪嘅波折同爭鬥,楊秀珍嘅冤案最後得以申雪,而宋世傑亦因為做返好事,從此生啲仔女都可以健康成長。

主要出場人物及演出者[編輯]

參考[編輯]

睇埋[編輯]