桂宮
桂宮（日文：かつらのみやKatsura no miya）係日本舊時一個宮家，亦係四世襲親王家之一，由誠仁親王細仔智仁親王響1620年創立，曾經多次改過宮號，由八條宮ー＞常磐井宮ー＞京極宮，去到桂宮。1881年，由於當主淑子過身，所以桂宮一度絕家。1988年，因為崇仁親王二仔宜仁親王繼承桂宮而再興，但係宜仁響2014年過身，又冇仔女，所以桂宮正式絕家。
歷史
[編輯]初代當主智仁原先係豐臣秀吉個契仔，後嚟豐臣秀吉生咗個仔鶴松，所以就同智仁解除咗契爺契仔關係，之後智仁另起宮家，宮號係「八條宮」，而宮邸（即佢住嘅地方）就係桂離宮。
之後傳到第五代尚仁親王，但係尚仁早死，冇仔女，所以時任天皇靈元天皇就派自己第十個仔作宮繼承八條宮，但就將宮號改叫「常磐井宮」。點知作宮響一年之後就以四歲之齡夭折，之後靈元天皇就派六仔文仁親王繼承，而後嚟文仁將常磐井宮改名叫「京極宮」。
之後傳到畀公仁親王，而公仁響1770年過身，但係佢冇仔女，所以由光格天皇第四個仔盛仁親王繼承，但就改名叫「桂宮」。可惜，盛仁響啱接任當主一位冇耐就夭折，享年一歲。後尾，由仁孝天皇第六個仔節仁親王接任桂宮，但係節仁都唔長命，響1836年就夭折，終年四歲。
仁孝天皇見到桂宮搞成咁，就做咗一個幾大膽嘅決定ーー就係由自己個女淑子內親王繼承桂宮當主一位。呢件事響當時嚟講係好罕有嘅事，雖然個時係允許女皇室成員繼承做天皇，但由女仔繼承宮家係日本史上第一次。1881年，淑子過身，桂宮一度絕家。
1988年，崇仁親王二仔宜仁親王另起宮家，但宮號一樣叫桂宮，呢個情況就同高松宮同埋有栖川宮差唔多（有栖川宮原本叫高松宮，後嚟改叫有栖川宮，但第十代當主威仁冇仔而一度絕家，而之後由大正天皇三仔宣仁親王另起高松宮），所以嚴格嚟講桂宮算係有咗繼承人。但宜仁響2014年死咗，冇仔女所以桂宮正式絕家。
歷任當主
[編輯]八條宮
[編輯]常磐井宮
[編輯]- 第六代：作宮
