廣州市真光中學

  提示：呢篇文講嘅唔係廣州市真光學校。

廣州市真光中學 Guangzhou True Light High School
爾乃世之光
位置
荔灣區白鶴洞培真路17號
明細
類	廣東省一級學校
校訓	爾乃世之光
成立	1872年
校區	荔灣區
級別	中學六年全日制
網站	http://www.truelightms.com/

鶴洞校區

增埗校區

龍溪校區

汾水校區

 廣州市真光中學（粵拼：gwong2 zau1 si5 zan1 gwong1 zung1 hok6） ，喺1954～1984年嗌過廣州廿二中gwong2 zau1 jaa6 ji6 zung1，係中國廣東省廣州市嘅一間中學，1872年成立，有兩個校區。呢間學校係嶺南地區最早辦學嘅其一學校，亦係廣東省國家級示範性普通高中。

兩個校區嘅詳細位置

• 高中部：荔灣區白鶴洞培真路17號。
• 初中部：荔灣區增埗灣畔大街2號。

校服色

廣州市真光中學嘅校服
註：三張分別喺2015年3月21號（左）、2015年9月9號（中）同2016年2月27號（右）影

• 短袖：衫　，褲　，兩邊帶有　　相間粗邊。
• 長袖：衫　　　，左右唔對稱，　線左高右低。褲　，帶有TRUELIGHT HIGH SCHOOL字樣。
• 風褸：　　　，左右對稱。

2007年之前短袖校服冇校徽，長袖校服嘅校徽擺喺校服正面嘅右胸位置。2007年9月開始，長短袖校服嘅校徽統一改嗮喺校服正面嘅左胸位置。

史

真光書院舊址，喺2015年9月9號影。

1876～1917年，真光書院嘅仁濟路校址。

喺芳村嘅私立真光女子中學校舍正門

初期籌備

19世紀中葉，外國傳教士得到清政府批准喺中國傳教，而開咗好多間國教會學校，方便以教育傳道。1867年，美國長老會差派女教士那夏理（Harriet Newell Noyes）到廣州熟悉情況後搞傳教活動。最後決定喺1872年開間女子學校。

學校正式成立

1872年12月8號，負責傳道嘅「真光書院」正式喺金利埠（今日嘅六二三路一帶）成立。開辦初期凈得6位女仔讀書，但無耐因火燭而搬到仁濟街（今日嘅仁濟路，中山大學孫逸仙紀念醫院門診部）一帶繼續辦學。1909年，書院改名做「真光中學堂」。

搬到白鶴洞一帶

書院喺1912年改名做私立真光女子中學之後，為咗進一步擴大教會喺中國嘅影響力，那女士同美差會傾咗下，喺白鶴洞蛇崗一帶買咗60畝地嚟搞學校，1917年起好。

抗日戰爭時期

1937年，盧溝橋事變爆發，學校先後搬到香港九龍肇輝台、連縣（今日嘅河源連平）三江墟、雙喜山、曲江縣（今日嘅韶關市曲江區）嘅上窯等地繼續辦學，重按國情開展抗日救亡嘅宣傳同訓練活動。1945年8月15號日軍投降後返到白鶴洞原址繼續辦學。

第二次國共內戰

1947年6月，白鶴洞真光女子中學、仁濟街真光中學（今日嘅長堤真光中學）同香港真光中學一齊搞創校75周年活動。之後招咗好多教員，再喺香港運返大批圖書同儀器，連校友會都捐咗校具畀學校而恢復返舊貌。

1949年9月，真光中學校董會決定再搬到香港，喺九龍塘窩打老道115號開咗間九龍真光中學。

學校被充公

中華人民共和國成立之後，喺廣州白鶴洞嘅真光中學畀咗市文教局睇住。1950年秋，受教會津貼嘅真光因嗰時美國政府同中國斷交而斷嗮糧，加上學費太高而勁跌到得返180幾位學生，好彩廣州市教育局出咗8400幾萬先可以繼續撐落去。

• 1952年～1954年秋：真光中學先後改辦成中山大學工農速成中學同粵秀師範初師部。
• 1954年秋：又改辦返普通完全中學，但改名做廣州廿二中。
• 1956年秋：奉命調整為初級中學。
• 1959年：學校變成廣州市系統四個先進單位之一。
• 1960年秋～1962年，學校實行中學五年一貫制嘅教育試驗。

文革時期

1966年文化大革命爆發，學校嘅大樓同教學設備俾人揼爛，連圖書、冚唪唥嘅科學儀器、生物標本都整爛埋，甚至連真光堂嘅部分建築都唔例外。後嚟使咗大概廿萬將協贊堂嘅綠瓦頂拆嚟整返，但就改成平頂結構。1969年秋復課之後，改成全日制普通完全中學。

幾次搬走

1976年，真光搬到海珠區洪德路（大概洲頭咀隧道附近）繼續辦學，原白鶴洞真光女中校址改成廣州市外國語學校。1981年秋，外國語學校同西村嘅廣州師範學校（今日嘅廣州市協和高級中學）合併，廿二中再搬返白鶴洞繼續辦學。

學校復名

喺真光嘅海內外校友嘅呼籲同要求之下，政府喺1984年10月14號批准學校改名做「廣州市真光中學」。

嶄新發展

• 1995年：成為廣州市第一批市一級學校。
• 1999年：按廣州市人民政府嘅城市體制改革要求，學校定位到芳村教育嘅龍頭兼視窗學校。
• 2002年9月：開辦廣州市真光實驗學校。
• 2002年12月8號：歷屆真光校友喺白鶴洞搞創校130周年、白鶴洞本部建校85周年聚會，重新開咗真光樓同新校門。
• 2003年：開辦真光中英文小學，形成一體兩翼嘅辦學體系。嗰年重升級到省一級學校。
• 2007年12月：學校升級成廣東省第一批國家級示範性普通高中同第一批廣東省普通高中教學水準優秀學校。
• 2011年：喺嶺南灣畔恢復返公辦初中。

事件

校外出血案

2013年6月8號上晝11點半（UTC+8）啱啱結束高考無耐，學校門口出咗單血案，有位高三（８）班嘅19歲嚴某考生喺學校正門對面嘅大口九飲吧買嘢飲時，俾宋某用刀銡傷咗，第一時間俾白車送到附近嘅廣鋼醫院，後嚟轉到廣醫三院搶救，最後無大礙。

據部分現場目擊者透露，案發之前有位卅幾歲嘅犯罪嫌疑人宋某一直喺大口九飲吧等高三（８）班嘅嚴某考生出嚟。當日11點半，嚴某喺學校出嚟時俾宋某直接銡傷。事發後，廣州市招考辦通知各個考點加派安保，確保考生安全出入考場。根據公安調查，初步懷疑犯罪嫌疑人宋某同嚴氏考生嘅阿爸阿媽有拗撬，從而有預謀噉向嚴某搞報復行動。

懷疑諾如病毒感染

2016年2月27號，有學校家長同學生反映當日凌晨同朝早，有學生集體腹瀉同嘔吐癥狀，懷疑集體食物中毒。當日好多學生話食咗學校飯堂啲餐餸之後又屙又嘔，集體嚟嗮隔籬嘅廣鋼醫院睇病。校方收到料後向食堂、宿舍、課室同飲水機搞全面清潔同消毒。當日申時中段，據荔灣區疾控中心鑒定，初步排除食物中毒嘅可能，懷疑呢次集體又屙又嘔同諾如病毒傳染有關。

註同攷

註

攷

睇埋

• 真光實驗學校
• 廣州市真光中英文小學