擁躉

擁躉（英文係 Fanatics，簡稱「Fans」或者「Fan」，香港人多數講成 fan 士fen1 si2，大陸人同臺灣人就多數講「粉絲」）係好迷好擁護啲偶像、球隊、或者事嘅人，即好「狂熱」嘅支持者。

成因同價值

俾人擁載嘅人，會稱佢哋為偶像；偶像通常會係一啲歷史人物、舉世名人、組織／國家領導人、知名藝人……等等。亦有人會因應佢自己體會到嘅行為價值，而封個別嘅人做佢嘅偶像。可以咁講，能夠成為偶像嘅人，佢本身一定係有啲值得人欣賞、尊敬同欽佩嘅地方。

除咗人會被擁載之外，其他嘢都可以有擁躉，好似足球籃球隊，支持者不斷咁喺場邊打氣，激起隊波嘅鬥志，去贏波，又可以幫手睇鬼；所以有人會話，擁躉就好似第十二個球員。

擁躉嘅出現係因為佢哋對一啲人物或事情產生着迷、傾慕嘅精神情緒，所以亦有用嗰樣被擁載嘅人或嘢之後加個「迷」字嚟形容呢班擁躉，好似：球迷、車迷、歌迷、影迷…等。

發燒友亦有類似意思。

擁躉可以有好多唔同嘅層次，有所謂「普通擁躉」，亦有俗稱「狂迷」嘅瘋狂擁躉，呢啲稱呼似乎可以代表擁載行為嘅唔同程度。

不過有個別嘅激進擁躉會用非理性嘅態度去表現自己，有啲係希望得到偶像嘅注意，可能只係想偶像望自己一眼，握一握手，將精神情緒推到瘋狂嘅極限，做出完全喪失理智嘅行為；有啲就為咗支時自己偶像而同其他唔同路嘅擁躉鬧交，甚至打起上嚟，最後變成大禍收場。

1983年，當時香港南華足球隊因為喺香港甲組足球聯賽嘅排名好低，最後要面對喺第二年降班到乙組比賽嘅命運，但呢件事就令到一眾擁護南華嘅球迷十分鼓燥，最後演變成香港史上嘅一次大暴動。而喺歐美一啲足球狂熱嘅國家，因為球迷爭執變成大騷亂、大暴動，最後釀成傷亡嘅事亦間唔中都會發生^{[未記出處或冇根據]}。

至於時下青少年喺追捧偶像嘅態度上亦似乎變得比以前盲目，有啲只得三分鐘熱度經常轉換偶像，只會人云亦云；而有啲更加用咗好多本來應該工作或者學習嘅時間嚟追星（呢班人被稱為追星族），除咗浪費大量時間同金錢之外，亦可能影響本身同影響埋偶像嘅日常生活，甚至影響自己嘅前途^{[未記出處或冇根據]}。