戴基海峽
58°34′49″S 65°54′34″W / 58.58028°S 65.90944°W
戴基海峽（粵拼：daai3 gei1 hoi2 hap6；英文：Drake Passage；西班牙文：Pasaje de Drake；葡文：Passagem de Drake），中國大陸又嗌德雷克海峽，臺灣又嗌德瑞克海峽，係南大洋嘅海峽，喺南美洲智利合恩角同南極洲南舍特蘭群島之間，連接大西洋同太平洋。佢既係世界上最闊最深嘅海峽，又係出現極地惡劣天氣最多嘅海峽，有「殺人西風帶」、「魔鬼海峽」同「暴風走廊」、「死亡海峽」之稱[1]。
名[編輯]
呢個海峽個名源自1578年發現佢嘅英國探險家——法蘭西斯·戴基。
概況[編輯]
戴基海峽係南美洲同南極洲嘅交界，海峽嘅北邊係智利火地島嘅合恩角，亦係南美洲最南邊嘅地方；南邊係南極洲嘅雪島同利文斯頓島；西邊同東邊分別係望唔到邊嘅太平洋同大西洋；雖然東西長大概300km，但南北平均闊800～930km，最闊有979km，最窄得650km闊。佢嘅平均深度有3,400m深，假設將座峨嵋山嘅最高峰放入去，山頂距離水面有320.7m。而最深位係南緯60.8°嘅南舍特蘭海溝，深度可以去到5,248m咁深，即使將兩座黃山同兩座上海中心大廈疊埋放入去，連樓頂嘅最高位都唔會飆出水面。
雖然佢係世界各地通去南極洲嘅緊要通道，但喺南緯60°嘅位幾得人驚下，因為佢係地球唯一冇陸地經過嘅地方，加上有西風漂流嘅洋流經過，而且成日形成極端氣候，所以當地又有尖叫60度之稱，有橫風橫浪係家常便飯嘅事，個浪有時可以去到20m咁高。由於南緯58°係極面地，以北地區嘅温度高過鹽份，以南地區嘅温度低過鹽份。另外，個海峽好多時有從南極飄嚟嘅冰山。
戴基海峽同佢北面嘅麥哲倫海峽都係連接太平洋同大西洋之間嘅主要航道，不過因為麥哲倫海峽比較窄，大型嘅船都會選擇行戴基海峽。雖然1914年巴拿馬運河起好之後，好多船都改行比較平靜同安全嘅運河，但係一啲過唔到運河嘅大船，仍然需要用到戴基海峽。
出入南極注意事項[編輯]
由於最近出入南極係呢條海峽，加上凈得水、空路先可以到。
- 水路：雖然價錢比較平，但要做好萬全嘅暈船浪準備，因為水路航行要40～60個鐘先至行嗮[2]，加上成日橫風橫浪，有超過80%機會暈船，有時隻船嘅傾斜度可以去到40～45°[3]。
- 空路：喺智利南邊嘅潘他阿里拿斯，有飛機可以直達南極洲嘅佐治王島，到佐治王島後轉Ocean Nova嘅輪渡就可以到[3]。雖然唔使成日暈船浪且1個半鐘多啲先至行嗮全程，但1個月內得好少航班，而且要好多錢先至去到。
註[編輯]
參考資料[編輯]
- ↑ 【南美洲旅游】魔鬼海峡-德雷克海峡Drake Passage 互聯網檔案館嘅歸檔，歸檔日期2016年7月30號，. 赛途旅游网
- ↑ 南極旅遊問題彙整三 世界旅遊專區
- ↑ 3.0 3.1 去南极旅游经德雷克海峡晕船比较厉害，有没有去南极旅行不晕船的玩法？ 知乎
有關嘅書[編輯]
- 中国少年儿童百科全书 自然·环境 第216页 浙江教育出版社 ISBN 7-5338-1946-2/G·1942