打仗理由

打仗理由（casus belli）係指聲稱有權開戰嘅理由，不論係真定係假。打仗係紛爭嘅一種，就算係硬搶都要有個理由去拗。中國古代打仗都要求出師有名。

正義仗

内文：正義仗

亞里士多德、西塞羅同埋聖奧古斯丁就有提出正義仗嘅觀念，一般認為打仗係最後嘅選擇，而且需要打仗理由。有時為咗證明打仗係迫於無奈，政府喺訂立外交政策時要確立戰爭條件，為可能打仗做準備，一旦到咗就宣佈打仗理由說服其他政權。

基於自身利益，多數人都會唔講理由而好自然咁抗拒打仗嘅，而且冇人想不明不白死喺戰場，無論係進攻定係防守都一樣。畀個理由嘅目的有時唔係說服其他政府，而係說服民眾，令佢哋冇咁抗拒打仗同徵兵，例如納粹德國嘅教育主張民族統一最重要，不惜要人民犧牲都要侵略捷克，利用社會價值內化加強打仗理由嘅說服力。

好多時作為宣傳戰，宣稱嘅打仗理由唔一定係真，因為合乎道德嘅打仗理由未必夠渲染力，而夠渲染力嘅打仗理由亦唔一定合乎道德。

詞語嘅使用

Casus belli係拉丁文，但係要到咗十七世紀後先多人用，主要原因係主張正義仗先至係道德興起（正義仗論，相對有利益無道德嘅現實政治，同埋永遠唔主動打扙嘅和平主義）

聯合國

聯合國憲章大大限制會員國可以用嘅打仗理由嘅範圍，主要指防止侵略同埋聯合國行動。另外，聯合國亦保留權力向非會員國嘅侵略行為作出制裁同干預，因此，打仗理由喺現代社會係好重要。

流行文化

喺電腦遊戲 Europa Universalis 同埋佢嘅續集，喺無指定打仗理由下開戰會令社會穩定度下降，導致國家容易動亂同稅收減少。呢個特徵喺其他電腦遊戲唔常見，例如三國志系列唔使講就可以開拖，就算要正式宣戰嘅電腦遊戲，正式宣戰嘅代價都好細。