撰稿人聯盟

撰稿人聯盟（WAMI），全名維護媒體獨立撰稿人聯盟（粵拼：jaan6 gou2 yan4 lyun4 mang4，英文：Writers' Alliance For Media Independence），係馬來西亞一個非政府組織，2001年6月8號成立，現任主席係黃進發。

組織宗旨

1. 維護及拓展馬來西亞言論同資訊自由以及媒體獨立；
2. 增進中文撰稿人同國內外志同道合嘅團體同個人嘅聯係及合作

成立背景

2001年，馬來西亞政黨馬華公會透過黨營企業華仁控股收購南洋報業控股，收購行動喺嗰年5月28號完成。旗下有《南洋商報》、《中國報》等十幾份報刊嘅南洋報業控股有71.5%股權落入馬華公會手度。與此同時，南洋報業嘅市場競爭對手朝日報業（後嚟改名做星洲媒體集團）亦被傳為馬華公會嘅合作夥伴。

為咗抗議政黨收購同財團壟斷華文媒體，42位評論人喺5月26號發表聲明，表示如果馬華公會收購南洋報社成功，佢哋將會放棄供稿畀《南洋商報》、《中國報》兩份報章，同時，喺《星洲日報》同《光明日報》公開否認朝日報業涉及收購嘅傳聞以及平衡報導反收購新聞同言論之前，佢哋亦停止供稿去《星洲日報》同《光明日報》。

5月28號收購成事實後，再有其他撰稿人加入行列，拒絕為上述四間報社供稿。6月8號，「維護媒體獨立撰稿人聯盟」宣告成立。

發展同轉變

撰稿人聯盟成立初期，為「528黃絲帶運動」嘅重要力量，成員通過大量撰寫文章同赴各地演講宣揚反媒體壟斷嘅理念。但係隨後聯盟入面一啲成員放棄原先立場，停止罷供稿行動。

參考

• 黃國富《掙紮在威權政體與族群政治中的媒體改革——以馬來西亞「撰稿人聯盟」的實踐為例》，載於《台灣東南亞學刊》第5卷第2期，2008。
• 曾維龍編《黃絲帶飄揚——2006馬來西亞反對媒體壟斷運動實錄》（吉隆坡：維護媒體獨立撰稿人聯盟，2007）。

出面網頁

• 維護媒體獨立撰稿人聯盟網頁