林家聲

林家聲，SBS，BBS（1933年1月18號—2015年8月4號），原名林曼純，係粵劇演員，廣東東莞人，生於香港大埔，佢家姐林家儀都係粵劇同電影演員。

入行歷程

1942年，佢以神童姿態演出第一個角色「武松」。1943年香港淪陷，林父帶一對仔女逃難到廣州，結識到薛覺先舊拍檔鄧肖蘭芳，鄧肖蘭芳做咗佢嘅啟蒙老師。

1944年初踏台板，獲當年廣州音樂界「四大天王」之一嘅尹自重欣賞，隨佢四出登台並改藝名林家聲。

佢嚮小學畢業後拜過幾位老師學粵劇，16歲由萬能泰斗薛覺先收做入室弟子，而家人人都認為林家聲係薛覺先嘅接班人。林家聲先後搞過「覺聲」、「寶鼎」、「家寶」、「慶新聲」、「頌新聲」咁多個粵劇團，受到劇迷擁護，尤其係頌新聲搞咗25年成為粵劇班霸。

1993年8月，林家聲嚮北角新光戲院做完1個月長嘅「林家聲粵劇藝術匯演」之後，就宣告退休，同妻子紅荳子（魏筱靈，1934年 - 2009年5月4號）移民加拿大多倫多。不過，林家聲不時返香港，關心同支持粵劇嘅活動。

佢晚年患上柏金遜症。佢喺2015年8月4號死，終年82。

粵語片

• 《賣肉養孤兒》（1947年）
• 《父母心》（1955年）
• 《天長地久》（1955年）
• 《胡不歸》（1958年）
• 《福祿雙星》（1962年）
• 《雷鳴金鼓戰笳聲》（1963年）
• 《無情寶劍有情天》（1964年）
• 《孝女珠珠》（1966年）
• 《情俠鬧璇宮》（1967年）
• 《李師師》（1967年）

電視

• 1976年 麗的電視 《林家聲粵劇特輯》

榮譽

• 1981年：獲頒「英女王榮譽獎章」
• 2005年：獲頒「銅紫荊星章」
• 2011年：獲頒「銀紫荊星章」

家庭

老竇曾經係大埔火車站站長。細仔潤添及太太紅荳子已先後離世，大仔潤笙移居加拿大。