格式手冊

  想搵粵文維基百科嘅風格指南嘅話，請睇Wikipedia:風格指南。

格式手冊（英文：style manual 或者 style guide），又叫風格指南，喺編輯同學術界，係指解釋點寫文章先叫 ｢啱格式｣ 嘅一種手冊，可以係一般文章用，有啲係喺某啲領域專用，甚至係公司機構內部用。有啲格式手冊本來係某啲領域用開，後來第啲人覺得個格式好，變成第啲領域都用埋。

所謂啱格式係指令文章感覺上有一致性（consistency），亦即係點寫先叫 ｢睇落似我哋出版社（或者學校、公司等等）出嘅嘢｣，但係有啲格式手冊可以好詳盡，講埋好多同文法有關嘅嘢（例如英文嘅芝加哥格式手冊），令到有啲人會以為唔啱格式就即係唔啱文法；但係其實格式唔係文法，唔同領域用嘅格式亦都會因為有唔同嘅讀者需要而有唔同。

視乎領域，有時會幾本格式手冊一齊用先夠用。例如，如果某本雜誌揀咗用加新社格式，但係有半學術文章，就可能要用埋芝加哥格式，等引用出處可以有標準格式，又或者如果係藝術雜誌，可能仲要用埋《藝術編輯協會格式手冊》（Association of Art Editors Style Guide）。咁嘅情況，就要寫低邊本用先，或者乜嘢情況先用邊本，亦可能有其他例外要處理；內部定落點樣處理哂爾啲情況，夾埋一齊嘅總體格式叫 house style（內部格式）。

英文格式手冊

喺英文圈，其中一本最常用嘅格式手冊係芝加哥大學出版社出版嘅《芝加哥格式手冊》（Chicago Manual of Style），但係因為佢嘅基礎係美式英文，所以喺英國唔會點用，而係用牛津大學出版社嘅 《New Hart’s Rules》。澳洲亦唔點用《芝加哥格式手冊》，而係可能會用《澳洲政府格式手冊》（Australian Government Style Manual）。加拿大有幾本自己嘅格式手冊，但係亦會用《芝加哥格式手冊》。

《芝加哥格式手冊》本來其實係寫來lei4畀學術論文用，所以感覺冇咁親切，所以報章雜誌通常唔會用，而係用通訊社出嘅格式手冊，例如喺美國通常係美聯社出嗰本，喺加拿大就通常係加新社出嗰本。因為網站通常都想畀人有親切嘅感覺，官方網站上面嘅文章通常亦都係跟爾種通訊社定嘅格式。

唔同嘅學術領域可能有自己慣用嘅格式手冊，例如心理學通常係用美國心理學會出嗰本。