歷史主義

出自維基百科,自由嘅百科全書
跳去: 定向搵嘢

有啲人認為必須研究同埋解釋人類歷史發展,基於呢啲解釋,先至可能認真了解社會與政治。呢種見解俾卡爾波普爾(Karl Popper)叫做歷史主義Historicism[1]

喺本文,「人類歷史」同「人類發展」或「人類發展史」相通,即喺英語 History 嘅廣義,而唔係「記錄往事」嘅意思。

簡介[編輯]

自古以來就有唔少人嘗試以研究同解釋個別人類歷史發展(如部落史、國王史)為基礎,去理解個別嘅社會同政治,認為了解歷史發展嘅趨勢就可以掌握未來發展,知道有乜趨勢會容易成功。

黑格爾係較早有系統咁去理解整體人類歷史發展嘅過程(睇辯證法),幫歷史主義建立基礎元素。呢種元素喺十九世紀興起,包括馬克思認為共產主義係人類發展嘅最終目標(睇歷史唯物主義)。

歷史主義有時會同還原論相比:還原論主張可以將人類發展還原為基本法則。例如,有啲人類歷史發展係由經濟法則所決定嘅(經濟決定論)。歷史主義者就以解釋個別人類歷史發展,建立佢相信嘅基礎法則。

「歷史主義」喺其他範圍有唔同用法。喺人類學上,「歷史主義」指人類或生物會適應當地環境而作出發展。喺神學上嘅使用,指一啲基督教教派亦會以「歷史主義」為名理解聖經嘅預言,特別係同教會發展作出關連理解。

卡爾·波普爾批評歷史主義嘅各種形式,指佢根源喺決定論同埋整體論

普世歷史[編輯]

內文: 社會進步普世歷史

康德喺提到普世歷史中開宗明義咁講,每種生物都會發展成為佢「註定嘅目的」(或叫「歷史嘅終結」),而人類作為獨有可以利用理性嘅生物,人類嗰歷史發展都有佢完整使用理性嘅目的:就係建立普世嘅公民社會。邁向呢個目的嘅發展就係社會進步


後世對黑格爾嗰歷史主義嘅詮譯,明顯比起康德嗰普世歷史豐富得多。黑格爾曾經教過學生,學生嘅筆記被後世稱為「歷史哲學講義」,佢嗰形式雖然是對唔同地方嘅歷史作逐一研究,但核心仍然以普世歷史為具體內容,亦即係不論歷史嘅形態喺各地唔同,速度亦都唔同,歷史都係由理性推動。喺黑格爾死後,佢嘅支持者喺詮譯普世歷史時有唔同取向,有啲支持認為當時嘅歐洲已經到達「註定嘅目的」,較重視國家機器同埋憲法嘅重要性,另一啲認為歐洲仍然存在好多矛盾,較重視辯證法繼續推動社會進步。隨之而來,歷史主義嘅發展變得多樣化。

因為馬克思共產主義被後世一步步實踐(至少共產政權對係咁講),共產主義嗰「註定嘅目的」本質亦為後世所留意,而且一般嚟講馬克思比起黑格爾更為人所知。

現代都有針對「註定嘅目的」嘅論述,例如法蘭西斯·福山相信現代社會嗰自由民主制已實際上成為自然人嗰「註定嘅目的」,但有啲因素(例造生物科技超人類之類)可能產生新嘅歷史目的。

新歷史主義[編輯]

內文: 新歷史主義

米歇爾·傅柯雅各·拉岡認為,喺理解某個觀念或某個論據時,必須先理解背後嗰歷史環境。呢個理論喺八九十年代發展迅速。

呢個態度喺理解同評論文學作品時亦有應用,Stephen Greenblatt 喺呢個學派嘅代表。

人類學上嘅歷史主義[編輯]

人類學學者法蘭茲·鮑亞士喺研究人類發展嘅時候,特別重視人類首先適應本地環境同文化語境,然後人類文化先慢慢向外擴散同互相影響(Marvin Harris後來叫呢個諗法做「歷史特殊論」)。佢領導嘅學派反對直向進化論(認為人類進化只有程度高低嘅差異之學說,因此產生進化光譜)。歷史特殊論同樣重視演化論嗰適應同競爭要素,不過適應到某個地區嘅文化唔一定可以適應其他地區。呢個學派嘅思想又反過來影響生物學嗰演化論,過去被叫做「進化論」喺今日要改名做「演化論」。

法蘭茲·鮑亞士用嘅研究方法是以採集經驗為主嘅,即係喺針對某個社會或某個事件中,研究人員需要採集好多導致呢件事件嗰輸入,然後達至有關嘅因果關係理論。因此呢個方法學被稱為歷史主義。但係同「普世歷史」觀念不同,咁嘅研究方法係冇可能建立廣義理論。

基督教嘅歷史主義[編輯]

歷史主義亦可以指一啲新教派系喺理解聖經(特別喺但以理書同坦啟示錄預言時嘅方法。按呢啲理論,有關預言係正在發展之中,既唔係只係喺過去出現亦唔係淨係展望未來。呢嗰派系將現世嘅教會(公教)與「真正教會」區分出來,並對公教作強烈批判。

批評[編輯]

卡爾波普爾[編輯]

卡爾波普爾喺《開放社會及其敵人》(英文:The Open Society and Its Enemies)中攻擊柏拉圖同埋馬克思有關佢哋歷史主義嘅立場,特別係有關佢哋認為歷史發展嘅必然性,罷黜咗每人貢獻社會演進嘅民主責任,因此導致極權主義

波普爾喺呢本書第二十二章亦反對「道德歷史主義」,反對從歷史發展中建立道德。呢個包括道德實證主義(當今當權者係啱嘅)、道德保守主義(傳統係啱嘅)以及道德未來主義(未來當權者係啱嘅),指呢三樣其實都冇任何道德標準可言。

波普爾亦抨擊阿諾爾得·約瑟·湯恩比嘅歷史相對主義(historism)(集中評擊《A Study of History》)。所謂歷史相對主義,就指所有歷史思想都侷限於佢嘅歷史語境同環境,因此新歷史主義係歷史相對主義。呢嗰悖論相對主義一樣:「歷史相對主義點樣脫離佢嘅歷史語境同環境,成為普世嘅歷史思想呢?」波普爾並唔反對歷史相對主義者嘅研究結論,只係認為呢個研究方法係反理性

[編輯]

  1. [The Open Society and Its Enemies, 第一章,第一至第二段, 作者: 卡爾·波普爾, ISBN 0-415-12739-4]

睇埋[編輯]

連出去[編輯]

普世歷史
  1. (英文)Idea for a Universal History from a Cosmopolitan Point of View (1784),康德寫
  2. (英文)歷史之終結與最後一人 法蘭西斯·福山寫 ISBN 0-380-72002-7
  3. 《開放社會及其敵人》中文譯本
基督教歷史主義
  1. (英文)historicism.net
  2. (英文)historicism.com
  3. (英文)historicism.org
  4. (英文)historicist.com