沈光漢
| 沈光漢 | |
|---|---|
 | |
| 出生日 | 1887年  |
| 死亡日 | 1972年 |
| 職業 | 政治人 |
[改維基數據] | |
沈光漢（粵拼：sam2 gwong1 hon3，1887年—1972年11月29號），字無畏[1]，中華民國陸軍中將。佢係廣東羅定泗綸鎮泗榮村人。1931年，佢做國民革命軍十九路軍第60師師長。佢統領嘅第60師，喺一二八事變參戰，亦係1933年閩變主力之一。
後生
[編輯]沈家世代耕讀。沈12歲入讀私塾，後入讀羅陽高等小學。16歲畢業，獲清朝新獎廩生[1]。
軍人生涯
[編輯]沈試過喺粵軍第一師軍官補習訓練班受訓，之後投身粵軍第一師。1925年，由蔡廷鍇推薦，佢做粵軍第一師第一旅第二團（團長蔣光鼐）第三營（營長黃質勝）上尉營副。1927年秋升第十師二十八團代理團長。1929年3月，第十師二十八團改編成廣東編遣區獨立第二旅（旅長蔡廷鍇）第一團，佢做上校副旅長兼第一團團長。到秋季，獨二旅擴建成第六十師，佢升做第一一九旅少將旅長[2]。第四軍參加北伐屢有戰果。1930年8月，蔡嘅60師同蔣光鼐嘅61師參與中原大戰，擊敗馮玉祥及閻錫山，擴編為十九路軍，由蔣做總指揮，蔡做軍長[3]。1930年10月，佢升任60師副師長[4]。1931年獲授四等寶鼎勳章。6月升任中將師長。
1931年九一八事變後，十九路軍調防上海。同時蔣介石受壓下野，南京政府由廣東派系主持，陳銘樞擔任京滬戍衛司令。1932年一二八事變，日本派陸戰隊登陸上海。沈率十九路軍第60師奮起迎戰抵抗，聲名大噪。10月，佢因此獲頒青天白日勳章。後來日本多番增援。蔣介石復出後，國軍亦派出中央軍共同作戰。最後事件以外交談判解決。
1933年11月20號，閩變正式爆發。蔣介石調8個師陸軍入閩對戰。1934年1月，閩軍頹勢顯現，逐漸退守泉州、漳州一帶。1934年1月21號（馬日），沈光漢、毛維壽、區壽年、張炎等將領，通電宣佈脫離福建嘅「人民政府」，擁護南京中央政府。佢哋嘅聲明係蔣平息閩變嘅主要原因之一。之後，十九路軍番號取消，部隊被分散收編。2月初，沈離開福建，先赴上海，跟住落香港，喺九龍塘金巴倫道買咗棟洋樓自住[5][6]。1936年發生兩廣事變。6月，桂系準備重組十九路軍，請沈做獨三師師長，沈拒絕去廣西工作[7]。
1937年7月，沈獲任命為委員長廣州行營參謀[8]。抗日戰爭時期，佢做過軍事參議院參議。
平民生活
[編輯]
妻子沈吳書蘭（1910–2015），抗戰時候係東北民眾抗日義勇軍嘅負責人之一[9][10]，有一個仔沈大中（1929–），喺廣州出世，喺香港、澳洲讀大學，主修土木工程及建築，喺澳洲做建築師，1962年返香港，1964年成立自己嘅建築師事務所。[11]。
1936年，沈光漢同朋友喺香港金巴倫道創辦九龍塘學校，係11位創校校董之一[12]，捐錢興建幼稚園部同小學部校舍。沈氏夫婦對校內教師優禮有加，每日派工友送來三餐。沈雖出身行伍，但特別重視教育，除咗喺香港辦學，抗戰時期仲返鄉下泗綸創辦泗水中學（今泗綸中學），出資興建校舍並購買各種教學用具。佢個仔後來亦繼承父志，捐錢資助教育。而今泗綸鎮沈光漢故居隔籬嘅泗榮小學入低設有「沈光漢紀念室」[13]。
抗戰勝利後，1947年，佢喺羅定縣當選第1屆國民大會代表。佢亦做過私立德業小學校長。
1949年後，沈氏一家定居香港。1951年，移居澳洲[13]。1972年11月29號朝頭早1點，沈光漢將軍喺香港屋企病逝，享年85歲。12月3號，喪禮喺九龍殯儀館舉行[14][15][16]。
沈大中話，佢爸爸曾經同佢講，「軍人要了解政治，卻不應以武力干政，軍閥之間嘅爭鬥係最浪費國家資源嘅無謂之爭[13]。」
故居
[編輯]22°44′7″N 111°16′47.5″E / 22.73528°N 111.279861°E
而今有間「沈光漢故居」喺佢鄉下羅定泗綸鎮泗榮村，係1920年起好嘅。
參考
[編輯]- ↑ 1.0 1.1 譚國偉 (1991-03-30)。〈沈光漢灼見機先〉。《廣東文獻季刊》。台北。21 (1)。｢沈光漢將軍，字無畏，廣東羅定泗綸同益村人。世代耕讀。十二歲入塾，後讀羅陽高等小學。十六歲畢業獲前淸新獎廩生。時値淸政不振，國是日非，乃毅然投筆從戎，追隨 國父及先總統蔣公，獻身革命，內除軍閥、外抗暴日，無役不與。勇敢善戰，不遺餘力，累積功勳，擢升陸軍六十師中將師長，並獲靑天白日、寶鼎勳章各一座。解甲後於三十六年膺選為羅定縣國大代表。後經商幷興學，對地方公益，贊助……｣
- ↑ 1929-09-06. 香港工商日報第三版：《沈光漢率隊出發河源》
- ↑ 1930-08-28. 香港工商日報第二張第二版：《蔡師報告 北方軍情 沈光漢來電》
- ↑ 1930-10-15. 香港工商日報第一張第三版：《蔡廷楷部 軍官之升調 沈光漢升副師長》
- ↑ 1934-02-19. 香港工商日報第三張第一版：《人民政府各軍政領袖之行踪》
- ↑ 1934-05-09. 天光報第三版：《沈光漢亦將出國研究土地問題》
- ↑ 1936-08-31. 香港華字日報第二張第一頁：《廣州長途電訊：沈光漢電翁照垣決不入桂參加工作》
- ↑ 1937-07-27. 香港工商日報第二張第二版：《沈光漢任行營參謀》
- ↑ 〈崢嶸歲月 赤子柔情 - 香港文匯報〉。paper.wenweipo.com。喺2018-06-18搵到。
- ↑ 〈十九路军抗日将领后人集体来湛〉。《湛江日報》。2012-09-24。喺2018-06-18搵到。
{{cite news}}: CS1 maint: url-status (link) - ↑ 〈建築師沈大中〉。www.luoding.gov.cn。喺2018-06-18搵到。
{{cite web}}: CS1 maint: url-status (link) - ↑ 〈九龍塘學校(小學部)〉。www.ktsps.edu.hk。原先內容歸檔喺2017-12-17。喺2018-06-18搵到。
- ↑ 13.0 13.1 13.2 大公網。〈沈光漢將軍故居_大公資訊_大公網〉。news.takungpao.com.hk。原著喺2018-08-30歸檔。喺2018-06-18搵到。
- ↑ 1972-12-02. 工商晚報第七頁：《沈光漢將軍病逝 明上午大殮出殯》
- ↑ 1972-12-03. 香港工商日報第十一頁：《抗日名將 沈光漢逝世》
- ↑ 1972-12-04. 香港工商日報第十頁：《沈光漢將軍 昨出殯哀榮》