渡江戰役

渡江戰役
第二次國共内戰嘅一部分
中國人民解放軍第35軍佔據咗南京總統府（35軍隨軍記者鄒健東1949年4月影嘅）
日期： 1949年4月20號－1949年6月2號 地點： 長江中下游 結果： 解放軍贏咗，解放軍跨過長江，佔領南京同埋上海，國軍長江防線失守，最終失去咗華東。
參戰方
中國國民黨 京滬杭警備總司令部 華中軍政長官公署 英國皇家海軍（紫石英號事件）	中國共產黨 中國人民革命軍事委員會 渡江戰役總前敵委員會 第二野戰軍 第三野戰軍 第四野戰軍（先遣兵團）
指揮官同領導者
湯恩伯 總司令 白崇禧 總司令	劉伯承 第二野戰軍司令員 鄧小平 渡江戰役總前敵委員會書記 陳毅 第三野戰軍司令員兼政委 粟裕 第三野戰軍副司令員 譚震林 第三野戰軍副政治委員
兵力
700,000個人	1,000,000個人
傷亡同損失
430,000個人	60,000個人

渡江戰役，又叫做京滬杭戰役，係第二次國共內戰臨完嗰陣，中國共產黨領導嘅解放軍喺1949年4月21日至到6月2號的時候，喺中下游地帶強渡長江，同中國國民黨領導嘅國軍湯恩伯同埋白崇禧兩個集團打嘅仗。

喺渡江戰役入面，解放軍其中嘅100萬人喺4月15號喺江蘇省至到安徽省開打渡江戰役，首先沿住條河摧毀國軍嘅防禦，之後再向南打。渡江戰役打完之後，解放軍攻入國民黨嘅政治經濟中心地區，以傷亡6萬多人嘅代價，消滅咗國軍嘅11個軍部同埋46個師，夾埋43萬多人。解放軍又佔領咗中華民國嘅首都南京，同埋上海、杭州同武漢呢啲大城市，加埋江蘇、安徽呢啲省，幫咗中共之後繼續攻入華東同華南地區。打完仗之後，中國國民黨領導嘅中華民國政府失去咗統治全國嘅基礎，最終走咗去台灣。

戰役背景

1948年尾到1949年頭，喺經過三大戰役，即係遼瀋戰役、淮海戰役同平津戰役之後，國軍嘅大部分精英重兵集團已經被消滅，解放軍軍力就大大增強，控制長江以北嘅大笪地區，開始準備渡江打仗。

自從1948年嘅秋天以嚟，國民政府受到軍事上嘅失敗加埋貨幣制度改革失敗嘅雙重打擊。12月27號，南京公務人員同公立學校教師嘅家屬連日緊急疏散。1949年1月21號上午10點左右，蔣介石召集咗一百幾個黨政軍嘅高級人員，喺喺佢自己嘅官邸舉行緊急會議。蔣介石發表下野文告，由副總統李宗仁做代總統。1月22號，提出同中共方面進行和平談判，但蔣介石仲係用佢國民黨總裁嘅身份掌握軍政大權，整頓軍隊，希望依靠長江防線嚟達到划江而治。蔣介石同時計劃將主要嘅機關同重要物資搬到去廣東、福建、台灣等地方，並準備將國庫儲備運去台灣。26號，中共接管依家南京市管轄區裡面嘅六合縣。

2月20號，中國人民解放軍第三野戰軍向所屬嘅各部發出《京滬杭戰役預備命令》。2月25號，中國共產黨中央軍事委員會用電報通知第二野戰軍同第三野戰軍，喺3月中旬或者下旬嘅時候，應該要準備佔領浦口同埋炮擊南京。

3月25號，解放軍開始炮轟安慶。3月28號，桂系軍隊撤出安慶，解放軍「集中九江，窺伺南昌」；駐守安慶嘅國軍獨力支撐，形勢非常危急。同一日，國軍嘅海軍封鎖安慶一帶嘅長江。去到4月中旬左右，解放軍消滅咗長江北岸大部分嘅國軍據點，淨係得番浦口、裕溪口同埋安慶仲有國軍駐守。

4月1號，國共雙方嘅代表團喺北平市（即係依家嘅北京市）舉行咗和平談判。4月13號，張治中由北平發電報畀李宗仁同何應欽，話周恩來今日見面嘅時候交咗一份《國內和平協定》，入面有八條，總共二十四款。張治中又向蔣介石發咗一個電報，話自己去到北平之後，中國共產黨嘅言論態度，目的就係在於逼降，並且勸蔣介石「毅然放下一切」。4月15日，國共談判代表擬定咗《國內和平協定》嘅最後修正案，定咗喺4月20日簽字。4月20日，行政院院長何應欽宣布唔簽中國共產黨提出嘅嗰八條二十四款，李宗仁同何應欽打電報要求國民政府談判代表張治中唔好簽名，和談破裂。1949年4月21日，毛澤東主席同朱德總司令發布命令《向全國進軍的命令》，命令解放軍渡江打仗。