澳門八景

澳門八景係澳門嘅旅遊景點，1992年由澳門八個社團聯合發起評選，由43個澳門景點中選出嚟嘅。

背景

據大清《澳門紀略》記載，由廣州府第一任澳門海防軍民同知印光任寫嘅「濠鏡十景」五言詩之中，抒發咗對昔日澳門美景嘅懷念同欣賞。濠鏡十景分別係：南灣浴日、蓮峰夕照、濠鏡夜月、雕樓春曉、三巴曉鐘、青洲煙雨、雞頸風帆、橫琴秋霧、望洋燈火、蘭寺濤光。但因時代變遷，昔日美景有啲已經冇咗。

喺1992年，由澳門楹聯學會、澳門攝影學會、澳門歷史學會、澳門中華詩詞學會、中區扶輪社、澳門美術協會、澳門獅子會同澳門教育文化藝術學會八個社會團體，組成新嘅澳門八景評議會。評選以考慮「歷史性、時代性、可觀性同連續性」原則，結果喺一年後，喺43個澳門景點中選出經共同評議嘅「澳門八景」。

松山燈塔

友誼大橋

澳氹大橋夜景

媽閣廟

普濟禪院外院

大三巴牌坊

盧廉若公園門外內望

龍環葡韻一角

黑沙海灘

澳門八景

燈塔松濤

• 松山砲台：位於澳門半島嘅最高點，1637－1638年起。
• 松山燈塔（又叫東望洋燈塔）：係中國沿海地區最古老嘅燈塔。

鏡海長虹

• 澳門友誼大橋：連接澳門半島同氹仔最長嘅一條大橋。
• 嘉樂庇總督大橋：曾經係世界最長嘅連續樑橋。

媽閣紫煙

• 媽祖閣（媽讀馬）：媽閣廟一，建於大明弘治年間，係見證澳門開埠嘅廟。

普濟尋幽

• 普濟禪院（俗稱觀音堂）：建於大明天啟年間，係澳門最大禪院同最具規模嘅廟。

三巴聖跡

• 大三巴牌坊：1582年（大明萬曆十年）起，係大三巴教堂遺跡，係澳門天主之母教堂正面前壁嘅遺址，亦係澳門嘅標誌性建築之一。2005年同澳門歷史城區其他文物成為世界文化遺產。
• 大三巴大砲台：原本係大三巴教堂嘅祭天台，​​曾經係中央砲台軍事禁區。

盧園探勝

• 盧廉若公園（簡稱盧園，別稱盧九​​公園）：融合蘇州園林同南方園林嘅特色，曾經係澳門三大名園之一。

龍環葡韻

• 龍環葡韻住宅式博物館：1921年落成嘅葡式別墅，展現歐陸風韻。
• 成個景區重包括：嘉模聖母堂、十字花園、氹仔市政花園同氹仔市政圖書館。

黑沙踏浪

• 黑沙海灘：奇特嘅黑色細沙，係澳門最大天然海濱浴場。

參考

• 澳門八景，澳門旅遊通勝

睇埋

• 澳門觀光景點

出面網頁

• 澳門旅遊通勝
• 澳門八景遊