癲狗病

癲狗病
分類同外部資源
染咗癲狗病嘅狗
ICD-10	A82
ICD-9	071
疾病DB	11148
eMedicine	med/1374 eerg/493 ped/1974
醫學主題詞	D011818
Patient UK	癲狗病

電子顯微鏡影到嘅癲狗病毒嘅相，由美國疾病控制與預防中心（CDC）喺1975年影得。相中細粒密集嘅灰色棒狀粒子就係癲狗病毒，仲可以睇到內基氏小體（生長喺神經細胞嘅癲狗病特有圓形病毒集合體）。

癲狗病（粵拼：din1 gau2 beng6；英文：rabies），係由癲狗病毒（rabies virus）引起嘅急性傳染病，屬於病毒性人畜共患病，會引起急性腦病，佢嘅病原體屬炮彈病毒科癲狗病毒屬。

多數人得咗癲狗病，係畀染病嘅狗（俗稱癲狗）咬親所致，所以稱做「癲狗病」。但實際唔止人同狗，大部分哺乳動物都會感染呢種病，譬喻靈長目、食肉目、翼手目動物。癲狗病嘅傳染，主要透過接觸感染，常見就係畀染病嘅動物咬親、搲親而中招，乃至畀呢啲動物舔啖，身上嘅傷口、黏膜掂到佢哋嘅口水，跟住領嘢。唔止動物傳畀人，動物之間都會按噉樣嘅方式傳染。

癲狗病係自古時就有記錄嘅病之一，離而家三千年前就有記錄。呢種病致死率好高，一旦發作幾乎百分百會死，會令腦部神經發炎，病情惡化就會痙攣、癱瘓，最後器官衰竭而死，同艾滋一齊係致死率最高嘅疾病。因爲有驚水等特徵，所以又叫恐水病（hung2 seoi2 beng6；英文：Hydrophobia），除咗水，聲同風亦會刺激到患者嘅感覺器官，引發痙攣。

呢隻病每年世界上約出五萬人嘅死者，當中九成半以上出自非洲同亞洲。畀感染動物咬嘅人中有40%係15歲未滿嘅細路仔。因爲好少人同人傳播，唔驚佢會大流行，所以喺傳染病對策上優先度比較低。