神經線

出自維基百科,自由嘅百科全書
(由神經跳轉過來)
Jump to navigation Jump to search
手嘅神經線(黃色)

神經線粵拼san4 ging1 sin3),又叫神經,係一束神經細胞嘅軸突,係周邊神經系統其中一部份,負責同身體其他地方之間嘅訊息傳遞。

結構[編輯]

神經嘅橫切面(英文)。神經外膜(Epineurium)、神經束膜(Perineurium)、神經內膜(Endoneurium)、軸突/神經纖維(Axon)、血管(Blood vessel(s))、神經束(Fascicle(s)/Axon fascicle(s))

每一條神經都由一層叫做外膜嘅結締組織包住。喺外膜入面,又再有一啲由一層扁嘅細胞組成嘅膜,叫束膜,包住一束束嘅軸突。呢一束束嘅軸突就叫神經束。軸突又叫神經纖維,每條都俾神經內膜包住。神經外膜之內又有血管,幫手提供養份畀需要用好多能量嘅神經細胞。

分類[編輯]

神經可以通過佢哋傳遞訊息方向嚟分類:

  • 傳入神經,又叫感知神經,將各種唔同嘅感官訊號傳入中樞神經系統
  • 傳出神經,又叫動作神經,將控制肌肉、內外分泌腺之類嘅訊號由中樞神經系統傳出去。
  • 混合神經,同時有傳出同傳入嘅工能。

神經又可以根據佢哋點連住中樞神經系統嚟分類:

  • 腦神經,係直接連接住腦部嘅神經線,通常用羅馬數字一(I)到十二(XII)嚟代表。
  • 脊𩪷神經,連接住脊𩪷。佢哋係用字母同數字組合嚟標示(例如:C1、T3),代表住佢哋經過邊一塊脊椎骨出嚟。

運作[編輯]

內文: 神經細胞神經編碼

神經係週邊神經系統嘅一部份,連接住中樞神經系統(即係腦同脊𩪷)同埋身體各部份,喺佢哋之間傳遞訊息。呢啲訊號係由叫神經脈衝(又叫動作電位或者簡稱脈衝)嘅電化學訊號,經由神經入面一條條嘅軸突嚟傳遞。包圍住軸突嘅髓鞘令到呢啲脈衝可以傳得好快,去到每秒120米。同中樞神經系統唔同,喺神經入面,髓鞘係由施旺氏細胞(Schwann cell)組成,而唔係由稀枝細胞(Oligodendrocyte)生成。

醫學[編輯]

有時神經線會受傷,影響到佢哋嘅運作。除咗撞親之類做成嘅物理創傷之外,工作勞損、例如俗稱打字手嘅腕隧道症候群都係搞到神經線受傷嘅原因。神經線俾嘢壓親,例如附近組織受傷腫咗、脊椎唔啱位、大肚之類嘅原因,可以令到人覺得、無力甚至郁唔到。好多時呢啲感覺未必會喺壓親嘅地方,而係離開一段距離嘅地方度。呢種情況叫牽連痛或者位移痛(Referred pain),成因係因為壓親嘅地方影響到傳遞自其他地方嘅神經訊號。

傷到神經線嘅仲有其他情況,包括細菌或者病毒感染糖尿病、神經線附近血管有問題、某啲神經退化病多發性神經病變/多發性神經痛同埋一啲免疫系統失調例如吉巴氏綜合症

喺有髓鞘嘅軸突(右邊)上面,神經脈衝會傳得快啲。

多發性硬化症係另一種免疫系統失調,令到佢哋攻擊神經系統,整傷啲神經線嘅病。喺呢個病入面,巨噬細胞會攻擊包住軸突嘅𩪷鞘,減慢甚至阻止神經脈衝嘅傳遞。

癌症嘅腫瘤細胞可以沿住神經線擴散。

通常神經科醫生會用身體檢查嚟診斷神經嘅間題,包括睇病人手腳嘅反射、行路同其他動作嘅姿勢、肌肉強度、體感同觸覺。如果有需要可以進一步做其他檢查,例如神經傳導檢查(nerve conduction study, NCS)同肌電圖(electromyography, EMG)。[1]

睇埋[編輯]

  • 李靜娥醫師. 神經傳導速度與肌電圖檢查. 臺大醫院 (中文(台灣)‎).