登打士街 (多倫多)

登打士街（英文：Dundas Street；法文：rue Dundas）係加拿大安大略嘅一條大街，喺1800年代已經存在，目前由多倫多直通到 GTHA 嘅咸美頓。

喺多倫多市內，呢條街分央街（Yonge Street）以東嘅登打士東街（英文：Dundas Street East；法文：rue Dundas Est）同央街以西嘅登打士西街（英文：Dundas Street West；法文：rue Dundas Ouest）。登打士西街夾麥歌盧街以西就係多倫多中區華埠，所以係少數喺多倫多有中文路牌嘅街之一。有輕鐵線（505號街車）同三個地下鐵站（登打士東西街交界嘅 Dundas 站、登打士西街夾 University Avenue 嘅 St. Patrick 站同登打士西街夾 Bloor 街嘅 Dundas West 站）。途經嘅主要地點包括多倫多都會大學、登打士廣場、伊頓中心、安省美術設計大學、安省美術館、多倫多中區華埠、多倫多西區醫院等等。

名

登打士街記念嘅係一個叫登打士（Henry Dundas）嘅18世紀蘇格蘭政客。1792年，喺英國嘅下議院有議員提出廢除奴隸制度，但係登打士提出廢除奴隸制度應該循序漸進，建議四年後先廢除，結果因為種種原因，英國要到1807年先廢除奴隸制度。

2020年，世界各地爆發黑人維權運動；因為登打士當年提出延遲廢除奴隸制度，多倫多有接近萬四名市民請願登打士街改名，2021年7月14號多倫多市議會通過登打士街同其他紀念登打士嘅市府設施全部改名，預計2023年初完成諮詢。