央街

多倫多南面市中心一段

多倫多北面北約克（六市合併前嘅北約克市中心）一段

Yonge（粵拼：粵化口語音：jang1，英文讀音：/jʌŋ/），書面語寫央街（英文：Yonge Street），係加拿大安大略南部嘅一條街，1794年開始起，本來起嚟運軍事物資，街頭喺多倫多最南篤嘅湖邊，號稱 ｢全世界最長嘅街｣，但係因為喺1997年安省政府將本來路綫重叠嘅央街同安大略11號公路拆開咗，佢喺1999年已經喺健力士世界紀錄大全度除咗名。

多倫多段

雖然 Yonge 並冇 ｢中央｣ 嘅意思，但係喺多倫多佢係中央嘅主要大街，打横嘅大街橫跨央街，通常都以央街為界分東西街，唔算大街嘅其他街，就通常以央街為界東西街唔同名。

多倫多地鐵1號綫嘅東面半截（所謂 Yonge 綫）亦大部分係貼住央街，由北面嘅 Finch 地下鐵站到南面嘅 King 地下鐵站都係沿住央街行，淨係 King 同聯合車站兩個站之間轉咗彎。