多倫多通道

多倫多湖間陸運徑曾經係一條好重要嘅運輸通道

條徑嘅地理位置，地圖寫明坎巴河原名 ｢多倫多河｣

多倫多河陸運徑（英文：Toronto Carrying Place 或者 Toronto Carrying Place Trail，法文：Portage de Toronto）又叫做坎巴河陸運徑（英文：Humber Portage）或者多倫多通道（英文：Toronto Route 或者 Toronto Passage）係加拿大一條已經冇咗嘅徑；位置喺安大略省，沿住坎巴河（前稱多倫多河，法文：rivière Taronto），由南便嘅安大略湖一直去到北便嘅閃高湖，全長大約45公里，可以行馬。

呢條徑本來係美洲原住民嘅水陸通道網絡嘅一部分，一直都有用開，歐洲人嚟之後亦都仍然係主要通道；佢雖然只係小路一條，但係當時好多地圖都有嘜低。1787年，多倫多地權收購簽訂，基本上成條徑落咗入英國人手上，漸漸被英國人嘅私人地斬斷；央街起咗之後，條徑亦逐漸式微，不過喺1812之戰嗰陣都仲有人用。

佢個名入面嘅 ｢陸運徑｣（英文：carrying place 或者 portage；加拿大法文：portage）係指用水路運輸嘅時候有時會經過一啲行唔到船嘅地方，要拎起隻船，連船帶貨改用陸路，直至去到下一個行得船嘅水體，但係呢啲唔行得船嘅路段唔一定係冇水；例如，呢條徑沿住條河，照計係行得船至啱；但係條河有瀑布同其他障礙物，一樣唔行得船。

呢條徑最北可以去到閃高湖，但係如果想去五大湖嘅曉倫湖，其實有兩個辦法，方法一係喺西岸經由 Matchedash Bay 過去，方法二係喺西岸經 ｢九哩陸運徑｣（Nine Mile Portage）再由陸路行過去。

喺法治時期，法國人曾經喺多倫多通道沿途起過三座城堡，用嚟經商，第一座1720年起，叫 Le Magasin Royale（皇家倉庫），位置喺現時多倫多嘅 Baby Point，之後1740年再起座大啲嘅，叫 Fort Toronto（多倫多堡），再喺1750年起咗座再大啲嘅，叫 Fort Rouillé（魯耶堡），位置喺現時多倫多嘅加拿大國家展覽場入面。

雙叉論

有啲人認為多倫多通道其實係兩條徑嘅總稱，包括西面沿住坎巴河嘅一條，同東面沿住紅河嘅另一條，例如喺多倫多入面紀念牌寫嘅就係咁講。