TTC
TTC（全寫 Toronto Transit Commission，有譯多倫多交通局或多倫多公車局，係加拿大安大略省多倫多市負責公共交通運輸嘅政府部門，營運巴士（bus）、輕鐵（LRT，一般人叫街車，streetcar）同地下鐵（subway，包括簡稱 SRT 嘅 Scarborough Rapid Transit）嘅路線。1921年成立，原稱 Toronto Transportation Commission[1]。2021年，TTC 總共載客 386,443,400 人次，每日 1,397,800 人次。
TTC 請咗超過12,000名員工，營運北美洲第三最繁忙嘅市區公共交通運輸系統，排喺第一位嘅紐約市同第二位嘅墨西哥城之後。截至2022年TTC總共有4條地下鐵綫，合共75個站。巴士同埋街車行走149條地面路線。
服務網[編輯]
巴士[編輯]
TTC 嘅大部分嘅巴士都係統一收費，只有少數快線收兩程錢；另外，部分 TTC 巴士線會駛入約克區（萬錦市），搭呢啲車嘅時候約克區同多倫多市嘅車錢通常要分開畀，因為 TTC 只係同 YRT（York Region Transit，約克區公車局）代收約克區嘅部份。巴士喺大街通常有24小時服務，但係夜晚可能要等要成個鐘先一班車。
輕鐵[編輯]
TTC 嘅輕鐵全部都係統一收費。因為約定俗成，而今統一叫街車（streetcar），但係其實一直都係正式叫做輕鐵（LRT）[2]；最初引入而今用緊嘅低地台車卡亦都係寫明佢係輕鐵車卡（LRV）[3][4]。
士嘉堡區嘅3號線有時會被稱為士嘉堡輕鐵，但係佢其實係架空嘅重鐵，係地鐵網嘅一部分，但係因為軌距唔同，所以唔能夠由2號線直通去3號線。
地下鐵[編輯]
TTC 嘅地下鐵亦都係統一收費。1號線喺西面一段（舊稱 University Line）會開入約克區（旺市），但係同巴士唔同，跨區搭地鐵係唔使畀兩程錢。地下鐵並唔係24小時服務。個別路段亦都會不定期喺服務時間關閉維修，喺服務時間關閉維修會提供接駁巴士服務。
復康專車[編輯]
除咗普通嘅巴士同鐵路服務之外，TTC 亦都提供一個叫做復康專車[5]（Wheel-Trans）嘅服務畀傷殘人士，佢其實係一種可以容納輪椅嘅一種類似的士嘅服務。[6]
轉車[編輯]
TTC 目前用嘅係兩小時內無限轉車制，但係只適用於用 Presto 卡畀錢嘅乘客。畀現金嘅乘客仍然要用一套非常難明嘅舊制用轉車證（paper transfer）轉車；喺 TTC 喺網站寫明邊度可以轉車之前[7]，其實舊制嘅好多條款都冇定義過，令到司機可以隨便要乘客畀兩次錢，例如喺好多條轉彎嘅巴士線都好難確定邊度叫做轉車地點（transfer point），乜嘢叫做行返轉頭（backtracking），乜嘢叫做停（stopover）。
出面網頁[編輯]
 |
維基同享有多媒體嘅嘢： Toronto Transit Commission |
參考[編輯]
- ↑ "Setting the Scene". The TTC – 100 Years of Moving Toronto. City of Toronto. 2022. 喺2022-09-04搵到.
- ↑ "Harbourfront & Spadina Light Rapid Transit". The TTC – 100 Years of Moving Toronto. City of Toronto. 2022. 喺2022-09-04搵到.
- ↑ "TTC invites public to preview next generation streetcar". 喺2022-08-21搵到.
- ↑ "Toronto Meet Your New Ride". Toronto Transit Commission. 原著喺2012-01-25歸檔. 喺2022-08-21搵到.
- ↑ 〈多語言熱線解決方案〉 (PDF). Access: Newsletter of the Wheel-Trans Community (Summer 2021): 3. 2021. 喺2022-08-25搵到.
- ↑ "Wheel-Trans". Toronto Transit Commission. 喺2022-08-21搵到.
- ↑ "Transfers". Toronto Transit Commission. 喺2022-08-21搵到.