安大略半島
 |
安大略半島（粵拼： on1 daai4 leok6 bun3 dou2，英文：Ontario Peninsula，法文：Péninsule de l'Ontario）位於加拿大安大略省嘅最南部，係加拿大最南端半島。安大略半島兩面臨五大湖，東側同北側分別分出布魯斯半島同尼亞加拉半島兩個更加細嘅半島，西南部嘅末端隔底特律河、聖克萊爾河同聖克萊爾湖相望美國密西根下半島，布魯斯半島隔曉倫湖同馬尼圖連島相望，尼亞加拉半島東面隔尼亞加拉河同紐約州相望。
安大略半島嘅大部分地區都屬於魁北克市-温莎走廊，係全加拿大人口最稠密、經濟最繁榮嘅地區，倫敦市、温莎市等重要城市都喺度。喺佢嘅安大略湖段湖岸更係有以多倫多為中心嘅金馬蹄地區，加拿大最大嘅城市群，北美嘅主要都市帶之一。
喺邊
[編輯]
安大略半島位於加拿大安大略省最南部。安大略半島走向西南，西臨曉倫湖，東濱安大略湖，南為伊利湖，西南部嘅半島末端隔底特律河、聖克萊爾河同埋聖克萊爾湖同密西根下半島相望。安大略半島嘅東側有尼亞加拉半島，往東向美國紐約州延伸，至尼亞加拉河與紐約州相望，而北側就有布魯斯半島，往西北伸入曉倫湖同馬尼圖連島相望。
氣候
[編輯]安大略半島處於炎夏亞型溫帶大陸性濕潤氣候（Dfa）同暖夏亞型溫帶大陸性濕潤氣候（Dfb）嘅交界線，其中艾塞克斯縣、查塔姆-肯特同埋大多倫多及咸美頓地區、尼亞加拉半島嘅部份區域屬於炎夏亞型氣候，剩低其他大部份嘅區域屬於暖夏亞型氣候。好似加拿大南部其他地區噉，安大略半島夏季温度暖至熱，降雨正常，有時會刮帶埋冰雹、破壞性風、旺季時甚至龍捲風嘅雷暴。冬季温度寒冷，降雪可以有時好豐富，特別係喺雪帶，不過有好多嘅回暖潮時不時提返高氣温。
