麥歌盧街

麥歌盧街夾皇后西街西北角嘅路牌，可以清楚見到中文名

麥歌盧街（英文：McCaul Street；法文：rue McCaul）係加拿大多倫多嘅一條細街，位於市中心北便嘅書院街同南便嘅皇后街之間。麥歌盧街夾登打士西街以西就係多倫多中區華埠，所以係少數喺多倫多有中文路牌嘅街之一。

麥歌盧街最北便夾 College Street 就係多倫多大學嘅聖佐治校區；夾登打士西街就係安省美術館同安省美術設計大學；夾史蒂芬尼街（Stephanie Street，本來有中文路牌，後來拆咗）有多倫多公車局嘅一個有蓋嘅街車廻旋處，上蓋連接安省美術設計大學嘅兩座細嘅非教學大樓。

安省美術設計大學主教學大樓樓下嘅 Butterfield Park 隔籬嘅嘉蘭公園園入面有一件亨利·摩亞嘅雕塑，件嘢本來喺1973年擺咗係麥歌盧街夾登打士街西南角嘅安省美術館出面，但係2014－2017年嘉蘭公園重建期間搬咗入公園。