白藤江之戰 (938年)

出自維基百科,自由嘅百科全書
跳去導覽 跳去搵嘢
938年白藤江之戰
嶺南南漢國攻打越南北部嘅戰事嘅一部分
Ngô Quyền đại phá quân Nam Hán trên sông Bạch Đằng.jpg
描繪咗938年吳權帶兵,同南漢軍喺白藤江交戰嘅東湖版畫,呢種畫係越南民間嘅獨特藝術。
日期: 938年
地點: 越南北部白藤江
結果: 吳權擊敗咗南漢軍隊,開始咗獨立建政嘅歷史
參戰方
南漢 交趾
指揮官同領導者
劉弘操  吳權
兵力
10000人 不詳
傷亡同損失
5000人以上 不詳

938年白藤江之戰粵拼baak6 tang4 gong1 zi1 zin3越南文Trận Bạch Đằng,938陣白藤,938?),即係喺五代十國陣,嶺南嘅南漢政權同靜海地區(而家越南嘅北部)嘅軍閥吳權之間嘅戰爭,以戰事地白藤江做名。呢一戰以吳權擊敗咗南漢告終,然之後越南(交趾)開始咗脫離中國大陸政權嘅獨立發展路。

背景同前戰[編輯]

喺930年,南漢君主劉龑派咗李守鄘梁克貞去攻打交趾,俘虜咗靜海節度使曲承美後就返咗去。冇耐曲氏嘅部將楊廷藝,就驅逐咗南漢啲軍隊,自己改做靜海節度使。喺937年,楊廷藝畀牙將矯公羨殺咗。到咗938年,楊廷藝嘅女婿吳權就喺愛州(而家嘅清化)起兵,反對矯公羨。佢召集同帶埋啲部隊由愛州去到咗安南嘅北面,包圍同攻打矯公羨所在嘅大羅城(亦即係螺城),俾包圍嘅矯公羨試過突圍未有得米,於是乎佢就向南漢政權求救,喺度等著有援軍打救佢[1]

劉龑喺呢一場仗前早就有吞併返交趾嘅諗法,隨即任命咗個第九仔劉弘操做靜海節度使,封埋佢做交王。劉弘操就以支援矯公羨嘅名堂,帶領超過二十萬人進入交趾去支援公羡嘅軍隊[2],而劉龔自己就喺海門(而家嘅廣西博白)度屯兵,做佢仔嘅後應。南漢崇文使蕭益認為喺發兵嘅呢陣時,啲時節雨多而且啲路都幾難行下,勸諫劉龑暫時放慢進兵嘅速度,仲建議要多啲用鄉導幫手帶路。蕭益佢係咁話嘅:

而今,啲雨已經落咗幾個禮拜咁耐,海上路線既危險又漫長。吳權係一位才華橫溢嘅戰術家。我哋唔能夠睇低佢。我哋嘅軍隊必須要謹慎起身,喺向南方慢慢噉前進嗰陣,我軍應該盡量用多啲偵察兵。

——南漢崇文使蕭益

但係,劉龑嘅諗法係快快趣趣打過去,好重新噉征服靜海,因而佢冇聽蕭益嘅笛,叫劉弘操嘅水軍繼續進兵,由海口(下龍灣)度進入咗白藤江。

喺劉龑調緊兵嘅同一時間,包圍著大羅城嘅吳權部隊猛攻,趁南漢後援軍隊嚟到前,攻到咗入城同殺死咗矯公羨[2]

戰役經過[編輯]

白藤江之戰嘅精品畫,係放喺越南河內嘅國家歷史博物館度向公眾展示

吳權得知南漢嘅部隊嚟到咗白藤江,就同啲將士講[3]

弘操𪜀侈稚疴𤵺,𨑻軍自賖旦,軍𪜯群痗𤻻,又𦖑公羡㐌𣩂,空固𠊚爫内應,㐌𠅎𤽶𠓀耒。軍些𥚄飭群劸敵𠇍軍痗𤻻,必破得。仍𦏓眾固利於戰船,些空防備𠓀時勢得輸𣗓别𠚢哰。𡀮差𠊚𨑻梮𢀲襪鈍頭𢃉鉄㨂砛於𠠩𨷯㴜,船𧵑𦏓眾遶渃潮𨖲𠓨𥪝行梮時𡢐𪦆些易皮制御,空朱隻鬧𠚢脱。
(劉弘操係個又憨居又冇腦嘅青頭仔,由咁遠水路帶啲兵嚟,啲兵仔實都好攰,又聽聞矯公羨死咗,冇人做內應,首先經已失咗魂喇。我軍有力而敵軍疲攰,實贏到佢。但佢哋好識行戰船,我哋唔防備先嘅話,會輸都未定。若果派人去帶啲木樴(亦即係木樁)、頂度包埋鐵,喺臨海口前邊水底閘住,佢哋啲船(一旦子)順潮水升漲入到啲木樴(範圍度)、我哋就容易控制,唔會畀任何一隻船走甩。)

——吳權

於是佢就命令啲手下軍士去斬咗啲樹木,愛來整啲木樴(粵拼zik1 ),插喺白藤江入海處啲險要江心度,同時間喺河岸一帶部署埋伏。

白藤江嘅水呢陣漲潮而升高埋,浸過曬啲帶鐵皮木樴畀人睇唔到。吳權當即叫水軍部隊去挑機,嘍啲南漢軍入港。吳軍戰鬥咗一陣就詐弟打敗仗後退,南漢水軍就跟住向前追擊,追到咗吳部隊嘅埋伏嘅位置。冇耐江水退潮,啲鐵皮木樴突晒出嚟,唔少南漢部隊嘅大船一埋到去,一係就俾閬(粵拼long6 )高炕沙(擱淺嘅傳統說法)喐唔到,一係就畀㓤穿個船底、一部部噉沉晒落去,唔少兵跟住浸死咗。吳軍啲伏兵就跟住出晒嚟,出動啲船仔去襲擊南漢軍,兩軍間變成咗白刃戰。呢一戰令到南漢軍大敗,損失咗超過一半嘅卒仔,主將劉弘操就畀擊殺埋。

南漢君主劉龑得知劉弘操冇咗之後,喊到好犀利,帶住殘餘嘅部隊退返南漢本土。

戰後[編輯]

吳跟住喺939年稱王,建立咗吳朝,都城係古螺城。由呢陣吳建政開始,南漢唔再南下攻打交趾。越南(交趾)開始咗脫離大陸政權嘅獨立發展路;到咗968年丁朝建立,越南(交趾)正式脫離咗中國大陸嘅中原政權而獨立。

參考[編輯]

  1. "Kỷ Nam Bắc Phân Tranh - Đại Việt Sử ký toàn thư". uni-leipzig.de. 原著喺2013-01-13歸檔. 喺2013-01-13搵到.
  2. 2.0 2.1 引用錯誤 無效嘅<ref>標籤; 無文字提供於名為informatic4嘅參照
  3. Tiền Ngô Vương 互聯網檔案館歸檔,歸檔日期2013年1月13號,. - 《大越史記全書

參考文[編輯]

睇埋[編輯]