刻 (時間)

  呢篇文講中國自漢以來嘅時間單位。想搵英文類似時間單位嘅話，請睇骨 (時間)。

用來計時嘅漏。多幾級平衡水壓，令水滴速平均。至下嗰個有把尺用來讀刻。

刻，時間單位一種，現代指四分一個鐘，即係15分鐘，又叫骨。但古時時間單位係用百刻制，所以同現代有啲不同。

古時而言，一日百刻，一刻百分，一分百秒。咁即係日有一百刻，一萬分，一百萬秒。

當今日常多數跟西洋時間，然而亦有啲地方會用刻，如通勝會寫低天文現象，如節氣時間、日食月食時間，幾時幾刻咁。

名稱

一般文都有機會叫刻。一刻嗰十幾分鐘，喺古時係短時間，個意思一直延用至。例如有卡通片叫相聚一刻。又例如稍等片刻，片刻就一刻時間都唔到，即係等一陣。又如刻不容緩，一刻時間都唔等得。又如即刻，就係當下依一刻，立即咁意思。

刻有時只當虛數，唔表示實際時間。例如「一時三刻」表示嘅係短時期，並非指一個鐘頭或者四十五分鐘。

英文

英文叫古時一日一百刻的「刻」做「centiday」，「centi-」即係百分之一，「day」即係日，所以「centiday」意為百分之一日，也即是古時一日一百刻的「刻」。

歷史

傳說

據說，中國自商就開始用百刻制計時。將一日分成一百刻。

周

然後到咗西周，西周又開始將一日分成十二時辰。因為時辰採用十二，所以自然一百刻同十二時辰唔可以整除，呢個係歷史上一直都係一個討論問題。故此歷史上都用過其他除得盡嘅刻制。

漢

漢許慎說文有寫，「漏、以銅受水、刻節、晝夜百刻。从水屚聲。」

由漢開始，漏依種計時器一直用於計時。

漏用銅造，至少有兩個壺，上面漏啲水落下面。一滴一滴咁用十進制計時，慢慢計時間。

壺有刻度一百份計一日水量，一份叫一刻。

而刻，正正喺漏上面刻度咁意思。

漏嘅好處，喺日頭定係夜晚都可以較均速計時，故此許慎說文寫「晝夜百刻」。

大明

萬曆年開始採用了九十六刻制。解决了流傳千年刻同時辰唔可以整除嘅問題。

大清

到大清，康熙皇帝又恢復咗明朝開始嘅九十六刻制。雖有人話，居心不良，妄圖竊走時間，破壞國運，但大清繼續改用九十六刻制。正式啟用今日嘅「日十二時，時八刻，刻十五分，分六十秒」嘅時間計法。

刻制

自漢開始，大多數用百刻制，中間有時會改，好似一百二十刻制、九十六刻制同埋一百零八刻制。

另外日本都有沿用百刻制，但有少數時期，有四十八刻制同三十六刻制。

百刻制

一日分百刻，一刻即西洋十四分鐘廿四秒正。因為西洋一日有八萬六千四百秒，咁一刻就有八百六十四秒，咁就會得出十四分鐘廿四秒正。百刻由於為十進制，尤其方便天文計算。而且承自漢，咁唔同時代都會一貫。

之不過，一年分約十二個月，生出以斗柄得出十二方位。日行喺十二方位邊處，計算時辰，得一日十二時，後來一時再二分初正，咁有廿四小時。百刻制同時辰制，數字唔可以整除。一時有八刻餘三分刻之一，一小時有四刻餘六分刻之一。為咗調和個數，就有將一刻，再分為十二小刻。咁一時就有八刻又四小刻，一小時有四刻又二小刻。咁就方便除盡，而且換算更為精細。

漢時喺時辰之前，已有一套一日分十六時段嘅計法，有夜半、雞鳴、黃昏、人定依名，成日喺文學出現。一時段有六刻餘四分刻之一。

大元郭守敬授時曆，計算完全唔理時辰。直情一日計一百刻，一刻計一百分，一分計一百秒。計算以分秒，可以用十進制數。

一百二十刻制

一日分一百二十刻，一刻即西洋十二分鐘正。因為西洋一日有一千四百四十分鐘，咁一刻就十二分鐘。一百二十刻制為校精密。

時辰制下，十二時同廿四小時而言，一時有十刻，一小時五刻，咁就整除到。

王莽把持漢家政務，建平元年，即西元前六年，改為一百二十刻制。並喺居攝三年，即西元八年，自己做埋皇帝，改名新國，改元為初始元年。直至地皇四年（更始元年），即西元二十三年，為人所敗滅亡，一百二十刻制亦告終。

九十六刻制

九十六刻有實施過，但百刻制一直係主流，直至到大清改制。

時辰制下，十二時同廿四小時而言，一時有八刻，一小時四刻，咁就整除到。

一日分九十六刻，一刻即西洋十五四分鐘正。因為西洋一日有一千四百四十分鐘，咁一刻就有十五分鐘。咁啱就同西洋一個骨一樣，方便同西洋天文換算。

南朝嘅梁國，天監六年即西元五〇七年，由百刻制改用九十六刻制。直至大同十年，即西元五四四年，由九十六刻制改用一百零八刻制。

西元一六四四，大清順治元年，愛新覺羅福臨做皇帝，多爾袞攝政。同年李自城攻入大明京城北京，頓時大亂，大明皇帝朱由檢自殺，吳三桂引清兵入關，大清入主中原，然而人才缺乏。天主教教士，為咗要傳教，睇淮時機，主動投身，並將崇禎曆法改頭換面，獻上清廷。大清此時要靠西洋天主教傳教士做欽天監。順治二年，西元一六四五年，改行時憲曆，廢百刻制改行九十六刻制，咁就方便佢哋同西洋換算。九十六刻制下，一刻正好同西洋一個骨一樣時間。因此當今通勝講何時何刻，就以九十六刻制計算。

一百零八刻制

一日分一百零八刻，一刻即西洋十三分鐘二十秒正。因為西洋一日有八萬六千四百秒，咁一刻就有八百秒，咁就會得出十三分鐘二十秒。

時辰制下，十二時計，一時有九刻，咁就整除到。廿四小時計，一小時四刻半。

一百零八為佛家一個微妙嘅數字，經常出現。故此見於佛教盛行嘅南朝。梁國大同十年，即西元五〇七年，由九十六刻制改用一百零八刻制。一用直到佢嘅下家，陳國天嘉四年，即西元五六三年，先至改返做百刻制。

晝夜

百刻制所用嘅漏，置於室內，唔需要點睇天候都可以計時，日夜都計到。咁後來 百刻制，亦會附上日照方位，時辰刻度，以及夜晚更點。

刻由日間午時開始，過夜到另一日。由於日夜長短會慢慢變化，咁就發展到會記每隔一個節氣左右，晝幾多刻，夜幾多刻，亦會畫上昏同曉，昏曉之間，分成五份，就係更數。古時打更就係按漏上面嘅更點報時。由於昏曉時刻會變化，故此刻度會定時定候換嘅，同天文相配。