知識提取
知識提取（粵拼：zi3 sik1 tai4 ceoi2；英文：knowledge extraction）係指由望落雜亂無章嘅數據當中搵出知識嘅過程：知識泛指對世界嘅一啲理解，而有咗呢啲理解，決策者能夠做出一啲對佢達成目標有利嘅行動（可以睇知識表示）；佢哋要攞有關世界某啲部份嘅運作原理嘅數據，用數據分析方法了解發生緊乜嘢事，再作出有關嘅決策。知識提取嘅步驟有以下呢啲[1][2]：
- 定義好要做啲乜（例：而家經營緊一隻網上遊戲，我哋嘅目標係想確保隻遊戲夠平衡）；
- 攞數據（例：編好個遊戲程式，個程式會做遙測，記錄每個角色有幾多玩家用）；
- 事前數據處理（data pre-processing），簡單啲講就係執靚個數據庫佢；
- 將數據編成清晰嘅量度指標（例：由「每個角色俾人用咗幾多次」當中計出每位玩家揀每個角色嘅機會率）；
- 數據分析；
- 視覺化（visualization），最簡單嘅係將啲數據畫成統計圖；
- 將結果報造俾相關嘅人士知；
- 按結果作出決策（例：知道某個角色零舍少人用，於是就 buff 佢，等隻遊戲平衡啲；可以睇吓遊戲平衡）。