石圍角路

Shek Wai Kok Road; 石圍角路
	石圍角路東段近石圍角巴士總站
基本資料
總長度	0.64公里
車速限制	50公里／小時
行車線數目	4線雙程（2線雙程分隔道路；蕙荃路至石蓮樓對出行人過路處）; 3線雙程（2線去二陂圳路方向同1線去蕙荃路方向，唔分隔道路；石蓮樓對出行人過路處至二陂圳路）
所在地區	香港新界荃灣區石圍角
起點	荃灣區荃灣蕙荃路
終點	荃灣區老圍二陂圳路
收費	免費
歷史資料
命名日期	1983年11月4號（首次刊憲）; 1990年11月2號（重新刊憲）
命名文件	《香港政府憲報》憲示第3497號; 《香港政府憲報》第3961號公告
通車日期	1980年7月20號（原本道路走線）; 1989年12月28號（而家道路走線）
地圖

石圍角路（英文：Shek Wai Kok Road）係香港嘅一條道路，喺新界荃灣區東北部嘅石圍角，全長大約640米，整體走向係西南—東北，西面連接蕙荃路、東面連接二陂圳路。

概況

石圍角路貫通成個石圍角，係區內嘅最主要道路，亦都係進出石圍角邨嘅唯一公眾道路。另外，呢條路同埋二陂圳路、三棟屋路都係荃灣市中心往返老圍、梨木樹一帶嘅最直接途徑，以及荃灣市中心往返城門隧道嘅第二直接途徑。

1980年7月20號，石圍角路配合石圍角邨起好而通車，並喺1983年11月4號正式刊憲命名^[1]。喺石圍角路落成初期，原本道路走線係西面連接德士古道北、東面連接象鼻山路。但係去到1980年代中後期，隨住德士古道北同象鼻山路先後改咗做高架道路同幹線道路，石圍角路西面盡頭改做連接蕙荃路，東面盡頭亦都改用下通道連接二陂圳路，個工程喺1989年12月28號完成。1990年11月2號，石圍角路重新刊憲命名^[2]。

石圍角路全段都係雙程行車，石蓮樓對出嘅行人過路處以西嘅路段有路壆分隔東、西行車輛，東行同西行方向各自有兩條行車線；而行人過路處以東嘅路段就只係用雙白線做分隔，東行（二陂圳路方向）有兩條行車線、西行（蕙荃路方向）有一條行車線。