神經細胞教義

由神經細胞教義始創者畫嘅神經細胞圖解

神經細胞教義（粵拼：san4 ging1 sai3 baau1 gaau3 ji6；英文：the neuron doctrine）係現代神經科學嘅基本原則。呢條原則講嘅嘢如下：神經系統係由互相之間分開嘅個體細胞（神經細胞）所組成嘅，而呢啲神經細胞之間會有連繫，組成一個大嘅網絡嚟控制隻動物嘅行為。

喺 19 世紀中，對神經系統嘅研究係基於網狀理論（reticular theory）嘅，呢個理論認為一個神經系統係一個連續、一舊過嘅物體，但喺 1887 年，有神經科學家運用當時嘅新細胞染色技術，發現咗神經組織係由一粒粒彼此之間分開嘅細胞組成嘅，令到網狀理論受廢棄。神經細胞教義同建基於其之上嘅神經科學理論將神經細胞（neuron）視為細胞理論（cell theory）下嘅一種特殊細胞（有齊一般細胞會有嘅特徵），研究單獨神經細胞嘅行為同用呢啲行為解釋神經系統嘅整體行為，為現代嘅神經科學定立咗個基礎。

內容

神經細胞教義包含咗多條原則，當中有啲係建基於細胞理論嘅，又有啲係建基於數據顯示嘅事實嘅：

• 神經單位（neural units）：個腦係由個別單位（神經細胞）組成嘅，而每個單位都有某啲特化構造，令佢哋扮演到佢哋嘅功能。
• 神經細胞係細胞（neurons are cells）：個腦嘅呢啲組成單位（神經細胞）同身體其他組織嘅細胞一樣，屬於細胞。
• 特化（specialization）：呢啲組成單位喺大細、形狀、同結構等方面可能依佢哋嘅功能而有所不同。
• 細胞核係關鍵（nucleus is key）：細胞核係粒細胞嘅中心，如果切開一粒神經細胞，得有細胞核嗰一邊會生存到落去。
• 軸突係細胞過程（nerve fibers are cell processes）：軸突係神經細胞嘅延伸。
• 細胞分裂（cell division）：神經細胞係由細胞分裂產生嘅。
• 接觸（contact）：神經細胞之間由某啲結構連接住（突觸），而突觸可以促進或者阻擋訊號嘅傳遞。
• 動態極化定律（law of dynamic polarization）：雖然話軸突可以雙向傳訊，但喺實際嘅細胞之間嘅傳訊之中，通常都會傾向淨係向其中一個方向傳。
• 傳訊一致性（unity of transmission）：如果兩粒神經細胞之間有接觸，噉個接觸一係刺激性（excitatory；一粒細胞啟動另一粒）一係壓抑性（inhibitory；一粒細胞關閉另一粒）嘅，而且永遠都屬同一性嘅。

睇埋

• 神經科學
• 神經細胞
• 腦
• 人工神經網絡

拎

• The discovery of the neuron.