2020年夏季奧林匹克運動會同中國大陸有關嘅事
喺2020年夏季奧林匹克運動會期間，有唔少同中國大陸有關嘅事，得到傳媒同國民一定嘅關注。
日本Niconico網民開幕儀式直播彈幕聲討中國
[編輯]今年奧運開幕儀式，日本影片分享網站Niconico都有直播。其中喺中國隊出場嘅時候，好多網民用上「武漢肺炎」、「元凶」、「責任」、「戰犯」等字眼形容中國。另外喺香港同台灣隊出場嘅時候，亦表示支持香港民主運動同埋台灣獨立同台日友好[1][2][3]。
中國運動員受關注言行
[編輯]陳清晨疑似爆粗鬧南韓代表
[編輯]喺羽毛球女子雙打項目裏面，中國喺其中一場派出陳清晨同賈一凡，並且對上南韓嘅金昭映同埋孔熙容。中國雖然勝出，但就有唔少網民喺比賽片段入面聽到，比賽嘅時候陳清晨不停爆粗鬧南韓嘅代表，試圖用聲音彰顯氣勢。陳清晨得到有啲中國大陸網民嘅支持，有啲網民甚至講到明自己就係雙重標準。不過，陳清晨事後就道歉話自己嘅發音令到大家誤會[4]。
中國網民欺凌選手爭議
[編輯]有部分中國網民，面對中國選手落敗嘅時候，特別係輸畀同中國關係緊張嘅國家（例如日本同台灣）嗰陣，都會有比較激烈嘅反應，除咗攻擊有關國家之外，甚至會攻擊選手本身，受害對象除咗打低中國嘅選手外，亦有中國自己嘅選手。
對於自己嘅國家選手成為中國網民針對嘅對象，日本大東文化大學社會學部教授野島剛（Tsuyoshi Nojima）話，中國網民呢啲唔理性或者無根據嘅批評，會令人質疑中國民意唔成熟。佢又話，喺中國網絡上唔能夠批評中國，但就可以批評其他國家，呢啲係習近平政權近年培養年輕人不受控愛國主義嘅結果，但國際社會唔會認同[5]。對於呢啲小粉紅欺凌唔同選手同公眾人物，有海外媒體就形容佢哋行為係「民族主義攻擊」[6]。
乒乓波混雙決賽
[編輯]7月26號，日本代表水谷隼同伊藤美誠喺乒乓波混雙決賽贏咗中國隊嘅劉詩雯同許昕。而福原愛喺呢次賽事入面，擔任富士電視台嘅評論員，本身亦係劉詩雯嘅好朋友，賽事結束後，有啲網民就走去逼福原愛表態，又話福原愛唔知醜[7]。
另外，中國大陸網民話水谷隼響比賽嗰陣吹波，質疑對中國選手唔公平；有中國網民仲叫水谷「去死」[8]。
射擊項目
[編輯]另外，一啲落敗選手，包括射擊項目嘅王璐瑤同王大鵬，都成為中國大陸網民批鬥嘅對象。例如，有啲網民對國家隊選手王大鵬人身攻擊，話佢「死胖子」、「人醜活差」[9]。
羽毛球項目
[編輯]喺羽毛球男雙決賽，台灣代表王齊麟同李洋贏咗中國嘅李俊慧同劉雨辰。結果有中國大陸網民洗版式抨擊兩位中國球手嘅表現，有人話佢哋輸畀台灣人就係罪，亦有人話佢哋想令蔡英文高興[10]。
體操項目
[編輯]喺7月28號，日本體操小將橋本大輝喺東京奧運男子個人全能賽決賽入面贏咗中國嘅肖若騰，引嚟中國網民對裁判評分標準嘅質疑。有網民甚至翻牆去到橋本大輝嘅社交網站嗰度洗版攻擊，仲製作一啲極具侮辱性嘅圖卡，引起日本網民高度不滿[11][12]。事件除咗引發國際體操總會發表聲明澄清之外[12]，就連肖若騰亦呼籲唔好攻擊運動員[13]。
另一名都係叫做橋本大輝嘅樂團鼓手亦喺佢嘅社交網站表示受到中國網民嘅騷擾[14][15]。
中國網民欺凌港台藝人爭議
[編輯]- 有啲台灣藝人，包括徐熙娣、蔡依林、徐佳瑩、魏如萱同埋吳映潔等，因為支持台灣奧運選手而被一啲中國內地網民攻擊，話佢哋支持台獨。就算有啲藝人已經避重就輕，唔提及「中華台北」或者台灣等字眼，佢哋都一樣遭受到中國網民嘅欺凌。事件引嚟台灣跨黨派譴責，而台灣文化部就以「沒有一位藝人，需要為了支持自己國家的選手而道歉」，寫文力撐台灣藝人[16]。
- 就連有啲表明愛國立場嘅藝人，一啲中國內地網民都唔放過。喺香港，歐陽震華喺微博分享一張中國乒乓隊同香港乒乓隊比賽期間嘅大合照，寫上「中港一家親」，但就被小粉紅攻擊，大開文字獄，話「中港」兩字有違一個中國原則[6]。另外，何超蓮喺社交媒體上載咗一張包含多位香港同埋中國奧運代表選手嘅拼圖，亦被中國內地網民批評點解冇包含台灣嘅選手[17]。
中國網民、傳媒、大使館批評官方同外國媒體選擇醜化中國選手相片
[編輯]有啲中國網民，中國媒體，甚至係中國大使館，指控奧運官方同外國媒體特登選擇咗一啲選手表情無咁討好嘅相去辱華同埋歧視中國人。牽涉嘅中國選手有朱瑩雪、劉靈玲、侯志慧等。
- 對於奧運官方媒體揀咗兩名中國體操選手朱瑩雪、劉靈玲比較表情猙獰嘅醜照，有部分中國網民話亦喺呢個問題上攻擊日本，話日本人格局細[18]。
- 路透社刊登一張中國舉重選手侯志慧嘅「表情痛苦」照片，報導侯志慧奪金嘅消息。但除咗部分中國網民外，就連《環球時報》同中國駐斯里蘭卡大使館都攻擊路透社，話路透社侮辱中國。不過，《香港01》之後嘅報導亦話，喺舉重賽事入面，選手因為用力而表情扭曲地舉起槓鈴既係必然嘅現實，亦係新聞攝影嘅「標配」，同一攝影記者所拍攝嘅印度選手查努（Saikhom Mirabai Chanu）嘅舉重照片，都有差唔多嘅表情，唔可以話咁樣就係醜化選手同佢代表嘅國家[19]。
有部份中國女子隊嘅成員，因為長相、聲線似男人，例如廖孟雪同童曾歡，成為今屆東京奧運會國際熱話，亦再次引起質疑性別、參賽不公嘅討論。有網民質疑，中國運動員一直有作弊嘅嫌疑，例如係為咗增加體能，長年服用男性激素[20][21]。
睇埋
[編輯]參考
[編輯]- ↑ NOWnews今日新聞 (2021-07-24)。〈東奧開幕直播「辱華」！中國進場遭日網友嗆：病毒發源地 | 全球〉。《NOWnews今日新聞》 (中文)。喺2021-07-25搵到。
- ↑ 〈日本人用奧運開幕儀式激死五毛？ 彈幕叫香港加油、台灣獨立國〉。winandmac.com (美國英文)。2021-07-24。喺2021-07-25搵到。
- ↑ 〈東奧開幕直播｢辱華｣!中國進場遭日網友嗆：諸惡的根源、病毒發源地 | 國際〉。《新頭殼 Newtalk》 (中文)。2021-07-24。喺2021-07-25搵到。
- ↑ 〈中國羽球女雙對南韓狂飆「我曹我去你」 微博狂讚！網友驚：是髒話 ｜ 蘋果新聞網 ｜ 蘋果日報〉。《蘋果新聞網》 (臺灣中文)。2021-07-28。喺2021-07-28搵到。
- ↑ 自由時報電子報 (2021-08-07)。〈中國在東奧形象更惡化 旅日南韓設計師嘆可笑「又是他們」 - 國際〉。《自由時報電子報》 (中文)。喺2021-08-07搵到。
- ↑ 6.0 6.1 〈東京奧運｜「中港一家親」都唔啱？歐陽震華遭小粉紅攻擊 - 今日娛樂新聞 | 香港即時娛樂報道 | 最新娛樂消息〉。am730 (香港中文)。原著喺2021-08-26歸檔。喺2021-08-09搵到。
- ↑ 〈中國桌球混雙敗給日本 福原愛慘遭網民出征痛罵「不要臉」 ｜ 蘋果新聞網 ｜ 蘋果日報〉。《蘋果新聞網》 (臺灣中文)。2021-07-27。喺2021-07-28搵到。
- ↑ 〈網路霸凌無國界！拿金牌也要被酸 日本桌球名將公布內容要反擊 ｜ 蘋果新聞網 ｜ 蘋果日報〉。《蘋果新聞網》 (臺灣中文)。2021-08-01。喺2021-08-01搵到。
- ↑ Fitz中國組 (2021-07-28)。〈[Fitz中國組] 大陸網民「批鬥」奧運選手惹國際關注 | Fitz中國組〉。《Fitz 運動平台》 (香港中文)。喺2021-07-28搵到。
- ↑ 〈【東京奧運】台羽男雙奪金中國憤怒 央視拒播頒獎禮 網民怒轟自己友 | 體路報道 | 立場新聞〉。《立場新聞 Stand News》。原著喺2021-08-01歸檔。喺2021-08-01搵到。
- ↑ 自由時報電子報 (2021-07-30)。〈見識到中國的噁心！橋本大輝IG被灌爆 日本網友火大了 - 國際〉。《自由時報電子報》 (中文)。喺2021-08-01搵到。
- ↑ 12.0 12.1 〈【東京奧運】橋本大輝奪金遭中國網民辱罵 國際體聯公開評分強調公正、準確 | 體路報道 | 立場新聞〉。《立場新聞 Stand News》。原著喺2021-08-01歸檔。喺2021-08-01搵到。
- ↑ 网易体育 (2021-07-29)。〈肖若腾呼吁:不要攻击运动员 每个参赛者都是最棒的_手机网易网〉。3g.163.com。喺2021-08-01搵到。
- ↑ 〈【同名同姓】日本樂團鼓手橋本大輝無啦啦被誤當體操王子遭中國網軍出征鬧爆〉。Menclub.hk。喺2021-08-01搵到。
- ↑ 自由時報電子報 (2021-07-30)。〈東奧》同名同姓鼓手 「橋本大輝」遭中出征 - 自由體育〉。《自由時報電子報》。喺2021-08-01搵到。
- ↑ Fitz中國組 (2021-08-03)。〈台灣藝人撐奧運選手被小粉紅全面攻擊，文化部: 沒有一位需要道歉 | Fitz中國組〉。《Fitz 運動平台》 (香港中文)。喺2021-08-03搵到。
- ↑ 趙允琳 (2021-08-09)。〈何超蓮上載拼圖感謝中港奧運選手付出 歌頌努力卻遭網民「審判」〉。《香港01》 (香港中文)。喺2021-08-09搵到。
- ↑ 民間全民電視公司 (2021-07-31)。〈東奧／故意放女選手醜照？奧運官方推特被中國網友痛批「辱華」〉。《民視新聞網》 (繁體中文)。喺2021-08-01搵到。
- ↑ 張智琦 (2021-07-27)。〈東京奧運｜英媒故意選醜照片「辱華」？ 國民應更有自信一點〉。《香港01》 (香港中文)。喺2021-08-01搵到。
- ↑ 〈【東京奧運】長相男性化成熱議 跨性別人士參賽奧運有多普遍？〉。Radio Free Asia (英文)。喺2021-08-01搵到。
- ↑ 〈中國奧運女選手男性特徵 再引質疑〉。www.ntdtv.com (繁體中文)。2021-07-31。喺2021-08-01搵到。