米爾格倫電擊實驗

出自維基百科,自由嘅百科全書
跳去: 定向搵嘢
「老師」(T)要接受「實驗者」(E)命令,電擊「學生」(L),電擊強度會一路加大,不過「學生」其實只係做戲,佢會喺被電嗰陣嗌到好慘咁,實驗目的就係想睇吓一個人受指使要去傷害另一個人時,會唔會因為見到人哋好痛苦而反抗指令

米爾格倫電擊實驗60年代美國社會心理學米爾格倫Stanley Milgram)做嘅心理學實驗,呢個實驗嘅方法引起好大道德爭議,但實驗嘅結果就發現,喺社會規範之下,人會變得順從,唔理呢種順從行為會唔會攞其他人命。

實驗喺1961年7月開始,米爾格倫做呢個實驗,係想知道喺猶太人大屠殺納粹追隨者,係咪只係因為服從上級命令,而走去殺人?

米爾格倫喺1974年發表「服從的危險(The Perils of Obedience)」解釋呢個實驗嘅意思:

「無論喺法律上抑或係哲學上『服從』都係一個重要觀念,但好少人會關心喺實際情況之下人會點樣服從。我喺耶魯大學設計呢個實驗,就係想試吓一個普通人,會唔會只係因為一個單純嘅命令,而去令另一個人受苦。當做主持實驗嘅人用好權威嘅態度,命令實驗對象去傷害另一個人,實驗對象執行命令時,會聽到佢搞嘅人受痛苦而慘叫,唔理實驗對象會唔會覺得咁樣唔安樂,主持實驗嘅人都會一路命令實驗對象加強對執行受苦嘅程度。結果實驗顯示人對權力都有好強嘅服從意願,而且喺權威之下乜都肯做,所以我哋一定要對呢種現象研究同解釋[1]。」

實驗[編輯]

實驗小組先喺報紙上登廣告搵人去耶魯大學協助一個大約要做一個鐘頭嘅實驗,報酬有$4.50美金。實驗地點選喺大學舊校區入面一間地下室,地下室有兩間用牆壁隔開嘅房。

搵返嚟嘅人年紀由20歲到50歲都有,包含各種教育背景,由小學畢業至博士學位都有。再同呢班人講,呢個實驗係關於「體罰對於學習行為嘅效用」,搵返嚟嘅人會扮演「老師」嘅角色,然後喺牆壁隔開嘅另一間房入面,會有呢次實驗對象「學生」,不過實際上呢個「學生」係由實驗小組嘅人,直正嘅實驗對象,應該係登廣告搵返嚟嘅「老師」至真,不過「老師」自己並唔知道。

之後,「老師」會有一張答案卷,而另一間房嘅「學生」就有一張問題卷,不過實際上兩張卷其實係一樣。然後「老師」要負責控制一部電擊控制器,佢要根據手上張答案卷同「學生」考試,如果「學生」答錯,就要用部電擊控制器電個學生,開始時會先由45伏特開始電,之後一路慢慢加。

不過實際上呢部電擊控制器其實無電,當學生答錯問題,老師開機電個學生,學生嗰邊會用錄音發出慘叫聲,於是喺老師心目中好清楚認為開機真係會電到個學生。實驗小組重會同其中一啲老師講隔離房個學生有心臟病。

電壓一路加,隔離房個扮學生嘅實驗小組人員都會播出唔同嘅錄音反應,由75 V 開始只係哇一聲;120 V 慘叫;150 V 開始話要退出試驗;200 V 大叫頂唔順;300 V 開始唔答問題;330 V 之後靜晒。

通常老師去到135 V開始會猶疑,但係實驗小組人員會同佢哋講唔使負責,即管繼續,之後有啲人會照繼續做,又有啲會一路做一路偷笑。不過其中有啲會話唔想做落去,實驗小組人員就會首先同佢講「請繼續」,再話想停,就講「你做開要做埋落去,請繼續。」,再想停就話:「你一定要做埋去㗎。」,都重話想停,就話:「你無得楝,一定要繼續。」

經過四次慫恿之後,都仲話想停,咁就真係會畀佢停,如果唔係就會一路做到450v三次之後先停。

結果[編輯]

未做實驗之前,米爾格倫曾經同佢大學心理學嘅同事做過調查,調查結果認為只有10份1人會一路做到最大450 V先停。

但第一次實際實驗結果,雖然其中有啲人做到一半會開始質疑呢項實驗,但最後都有成百份之65,即係40人中超過27人都做到足最大450 V先停。

爭議[編輯]

參考[編輯]

  1. Milgram, Stanley. (1974), "The Perils of Obedience". Harper's Magazine. Abridged and adapted from Obedience to Authority.

[編輯]