統計學史

統計學呢門學問最少有得追溯到去公元前 5 世紀咁久遠。一般認為，最早可以算係統計學嘅著作嚟自公元 9 世紀嘅《密碼破譯》（英文：Manuscript on Deciphering Cryptographic Messages）呢本書，由阿拉伯人學者 Al-Kindi 編寫嘅。喺呢本書入面，Al-Kindi 佢詳細噉記錄咗點樣用統計數據同頻率分析破解密碼，而主流意見認同，統計學同密碼學（cryptography；研究點樣喺敵人存在下安全通訊嘅學問）就係噉一齊誕生咗。

世上第一本統計學入門書一般認為係源自 14 至 17 世紀。喺 14 世紀，佛羅倫斯嘅銀行家兼執政官佐凡尼·維蘭尼（Giovanni Villani）編訂咗《Nuova Cronica》呢本歷史書，包括咗好似係人口、法令、商貿、教育同埋宗教場所呢啲嘢在內嘅統計數據，俾人話係歷史上第一本教人做基本統計嘅書；另一方面，有啲學者就將 1663 年莊·葛蘭特（John Graunt）根據死亡率統計表編訂出版嘅《Natural and Political Observations》（粵文：「自然與政治觀察」）呢本書定格做統計學嘅始祖。

「統計學」嘅名可以追溯至 18 世紀：統計學嘅英文名「statistics」係源自於拉丁文嘅詞語「statisticum collegium」（意思係「國會」噉解）同埋意大利文入面嘅「statista」（「國民」或者「政治家」噉解）；德文入面「statistik」呢個字最早係喺 1749 年有人用嘅，代表對國家嘅數據做分析嘅一門學問，亦即係「研究國家嘅科學」；清朝末期（19 世紀尾到廿世紀初），唐人學者將西學引入大中華地區，作咗「統計」呢個詞語嚟代表呢門研究數據嘅學術，俾人一路沿用到而家。