荔枝角道
荔枝角道（英文：Lai Chi Kok Road）係香港新九龍一條馬路。路綫大柢同長沙灣道，由旺角、經大角嘴，貫通深水埗、長沙灣到荔枝角為止。佢東南駁彌敦道，西北駁葵涌道，全長約莫3.6千米。當中西九龍走廊長沙灣尾落橋位，去到葵涌道天橋一小段，係5號幹線一部份。
史
[編輯]最初只荔枝角道分兩段。第一段由望角（今日旺角）上海街，伸到去黃竹街，入最舊深水埗市區，到欽州街止到海邊。其後，由上海街伸長到彌敦道同水渠街交界，弼街街口。之後填海起深水埗營盤，深水埗一段稍稍伸到九江街為止，到營盤為止。
而另一段係荔枝角嗰度，最初係荔枝角對出軍用填地。呢段即係家陣荔枝角消防局經美孚新邨萬事達廣場到荔灣道止。1960年呢兩段因為長沙灣填海，先至駁通。跟住荔枝角交匯處同葵涌道天橋起好。1970年代，美荔道起好，條街由美荔道同荔灣道一段，變成美孚新邨露天嘅萬事達廣場，唔畀車行，美荔道替咗佢個位。
各段
[編輯]荔枝角道係雙程路，每邊有兩到三綫，由旺角伸到去荔枝角。
旺角同大角嘴段
[編輯]
荔枝角道係最早期一條馬路，畀車深水埗市區駁去九龍半島其他地方。呢段東南起自旺角彌敦道、弼街、水渠道大路口。去到旺角北便、深水埗同大角咀交界嘅界限街同黃竹街路口。中間主要路口有上海街、廣東道同塘尾道。
呢段喺1920年代起，初時望角（家下旺角）重係村地。而當時九龍至旺嘅街係上海街，所以亦以佢為起點[1]。靠近塘尾，家下大角嘴重係山來。過咗塘尾邊黃竹街，就入深水埗市區。
荔枝角呢段主要係住宅，唐樓同洋樓都有。旺角路口，對住始創中心，而路口三角地，叫旺角康民角，有環境保護署路邊監測站。砵蘭街同太子道西之間一段，有旺角維景酒店。去到塘尾道口，有古蹟雷生春大廈。
深水埗段
[編輯]
荔枝角道深水埗段，貫穿深水埗最舊市區，由今日黃竹街同界限街交界個位，到欽州街口，當時欽州街經已係海皮[2]。呢段有幾個路口，有界限街、黃竹街口，有南昌街口，重有北河街、桂林街，到欽州街。呢段荔枝角道，設計時比其他街闊落。
呢處主要都係唐樓同洋樓，標誌有南昌街明渠，不過經已冚密。近桂林街口有香港能仁書院。
長沙灣段
[編輯]
由欽州街到甘泉街呢段，全段都喺長沙灣嘅填地之上。條路係曲尺形，喺長沙灣徑屈咗一屈。過長沙灣警署屈向蝴蝶谷。
條路起法係跟填海，當時係由荔枝角同深水埗各有各填，而荔枝角道就各有各伸長，最後先至駁埋。最先填嘅係欽州街到東沙島街打出一段，為咗起深水埗營盤而起。但因為營盤都幾大，荔枝角道只伸到去九江街。
呢段荔枝角道主要係公共設施為主，視野好闊，去到近荔枝角嗰邊，有工廠大廈同私人屋邨。欽州街口有深水埗警署，側邊有麗閣邨，去到東京街口。另一邊有深水埗公園同游泳池。東京街到發祥街，一邊有哥爾夫球場、另一邊有廢屠房，同埋蔬菜批發市場。發祥街到興華街，有香港專業敎育學院黃克競分校。興華街有長沙灣臨時家禽批發市場同深水埗運動場。過通州街口宇晴軒、昇悅居同泓景臺三個私人屋邨。長茂街有長沙灣警署。
荔枝角段
[編輯]荔枝角一段，只係單程入美孚。由同蝴蝶谷道同葵涌道口開始，貼住葵涌道天橋，到美荔道為止。
呢段路1920年代就有，只不過當時未有名。最初佢駁住青山道，位置喺家下荔枝角消防局開始伸到家荔灣道，當時係填海邊，對住荔枝角灣。1920年代軍地[3]，之後有煤倉同油倉。後尾油倉變成美孚新邨。當時荔枝角道尾嘅荔灣道，叫荔枝角沙灘道，可以入去荔枝角灣嘅泳棚。1960年代尾到1970年代初，荔枝角交匯處同葵涌道天橋起好，變成家咁樣。之後美荔道起好。美荔道到荔灣道一段，變成美孚新邨露天嘅萬事達廣場，唔畀車行。自此，去灣嘅路由美荔道替咗佢個位，而荔枝角道縮短少少到美荔道為止。
葵涌道天橋底可以轉入長沙灣道，掉頭出九龍市區。而荔枝角道尾直行係荔枝角大橋上橋位，直入葵涌道。葵涌道橋底，亦有美孚巴士總站。入巴士站嘅巴士全部經呢段荔枝角度入，經另一邊長沙灣道出。
呢段路主要有九龍巴士總部、美孚新邨、美孚巴士總站同荔枝角消防局。
註
[編輯]
