菅義偉
| 菅義偉 | |
|---|---|
.jpg) | |
 日本內閣總理大臣 | |
| 前任 | 安倍晉三 |
| 繼任 | 岸田文雄 |
| 日本自由民主黨總裁 | |
| 前任 | 安倍晉三 |
| 繼任 | 岸田文雄 |
| 日本內閣官房長官 | |
| 前任 | 藤村修 |
| 繼任 | 加藤勝信 |
| 個人資料 | |
| 出世 | 1948年12月6號 日本秋田縣雄勝郡 |
| 配偶 | 菅真理子 |
| 父母 | 菅和三郎（老豆） |
| 母校 | 法政大學 |
.jpg)
菅義偉（粵拼：gaan1 ji6 wai5，菅 義偉（すが よしひで ?），1948年12月6號—）係日本政治人，2020年到2021年任內閣總理大臣、自由民主黨總裁、內閣官房長官、北朝鮮綁架問題擔當大臣，做過總務大臣同郵政民營化擔當大臣。
生平
[編輯]菅義偉喺1948年出世，屋企係出身秋田縣嘅農家。喺佢高中畢業之後，菅義偉覺得自己冇可能考到同家姐一樣咁好嘅學校，於是決定去東京打工。佢最初喺紙箱工廠打工，但係佢好快就發覺呢種生活同喺鄉下嘅差唔多，於是做咗一陣就冇再做落去。後嚟佢每日返兩份工，朝早響築地市場度做，夜晚又喺新宿嘅餐廳打工[1]，如是者做咗兩年嘢之後，菅義偉儲咗啲錢，考入咗法政大學法學部政治學系半工讀，揀入法政大學嘅原因係因為呢度學費平過其他私立大學。到佢畢業之後，佢去咗建電設備度打工，但係佢個心都係想向政治方面發展。
到1975年，佢經法政大學嘅就業諮詢，識咗一樣係法政大學舊生嘅前眾議院議長中村梅吉，中村嘅秘書再介紹佢去到眾議院議員小此木彥三郎，自此佢就成為小此木嘅秘書。
1987年，菅義偉第一次去選橫濱市議員，但最初唔被睇好，但係佢堅持逐家逐戶去「洗樓」拜訪，結果贏咗。由於佢喺做秘書嗰陣累積到唔少人脈，加上橫濱前市長高秀秀信任內，成日搵問佢有關任用人事上嘅意見，令佢畀人叫做「橫濱影子市長」。
1996年，菅義偉第一次參加國政選舉，喺自己嘅地頭神奈川縣第二區出選，最後贏咗。入到國會之後，菅義偉拜小此木嘅朋友梶山靜六為師（當時小此木已經過身），亦都跟梶山加入黨內派系平成研究會。[2]
1998年，平成研嘅會長小淵惠三想出嚟選自民黨總裁，但係同派系嘅梶山都想選，最後梶山退出平成研究會，菅義偉亦都跟住一齊退出。後來佢改為加入宏池會，喺2000年「加藤之亂」嗰陣，佢冇支持同派系嘅加藤紘一，喺呢件事之後，宏池會分裂成兩派，菅義偉就加入反加藤嘅堀內派。到2009年之後，菅義偉就冇再入其他派系。[3]
2006年，當時安倍晉三第一次任相，菅義偉亦都第一次入閣，擔任總務大臣，後來安倍只係做咗一年左右就因為健康理由辭職，菅義偉亦都冇得再做。
2012年，自民黨打低咗民主黨，重奪政權，安倍揀返菅義偉入閣做內閣官房長官，安倍同菅義偉喺政治上嘅關係好緊密，好多人形容菅義偉係安倍晉三喺政治上嘅老婆。而喺菅義偉做內閣官房長官嘅期間，從來未失過言，畀外界叫做「安定之菅氏」。[4]
2019年4月1號，嗰時係內閣官房長官嘅佢宣佈新年號係「令和」，之後佢就多咗個花名叫「令和大叔」。
2020年9月16號，佢接替安倍晉三，成為日本第99任內閣總理大臣，籌建新內閣。[5]佢亦都係第一個以無派系身份當選自民黨總裁嘅人。不過佢在任期間被指應對武漢肺炎疫情不力，民望一直下跌，最後佢宣佈唔參加2021年9月嘅自民黨總裁選舉，同時放棄連任首相。10月4號，由新任自民黨總裁岸田文雄接任首相。
參攷
[編輯]- ↑ Storm.mg (2020-09-11)。〈「令和大叔」能否殺出重圍？農家出身的菅義偉，如何走到日本政壇的「一人之下」-風傳媒〉。www.storm.mg (臺灣中文)。喺2020-11-01搵到。
- ↑ 〈令和的豐臣秀吉？菅義偉如何爬上來 | 假才子〉。《眾新聞》 (中文)。原著喺2020-11-08歸檔。喺2020-11-01搵到。
- ↑ 〈【日本新首相】菅義偉將拜相 農民變首相是如何煉成？ - 香港經濟日報 - 即時新聞頻道 - 國際形勢 - 環球社會熱點〉。inews.hket.com。喺2020-11-01搵到。
- ↑ 歐敬洛成依華 (2020-09-14)。〈菅義偉「木訥大叔」之逆襲 從農家之子邁向無派系首相勝在夠貼地〉。《香港01》 (香港中文)。喺2020-11-01搵到。
- ↑ 〈【日本新首相】最長安倍內閣謝幕 菅義偉傍晚接捧〉。香港經濟日報。2020-09-16。喺2020-09-16搵到。
出面網頁
[編輯]
 |